Minister-in sorkar laipui hotute a kâwm

Minister of state Lalnghinglova Hmar chuan November 18, Thawhṭanni khan New Delhi-ah sorkar laipui ministry hrang hrang secretary-te bakah, NITI Aayog, Asian Development Bank leh HCL Foundation hotute a kâwm a, a department enkawlte tihhmasawnna tur a sawipui.

Lalnghinglova Hmar hian Ministry of Labour and Employment (MoLE) secretary Sumita Dawra kâwmin, MoLE hnuaia scheme - Employment Linked Incentive (ELI), Employees’ State Insurance (ESI) leh Employees’ Provident Fund (EPF)-te Mizoram tana ṭangkai leh hlâwk zawka kalpui dan tur a sawipui a ni.

Sports Minister chuan, Ministry of Youth Affairs and Sports (MYAS) hnuaia Department of Sports secretary Sujata Chaturvedi kâwmin, infiamna lama Mizoram sorkar hmachhawp leh hmalak meknate a sawipui.

Mizoram chu state lian lo leh mihring tlemna, state sports budget pawh tam lo tak ni mah se, mi náwlpuiin infiamna an ngainat thu leh chhungkaw eng emaw zat tan eizawnna tling a nih thu Minister chuan a sawi a; Sujata Chaturvedi chuan, MYAS bakah, ministry dangahte pawh sports project lian tham siam tura chahin, a theihna zâwnah theihtawp a chhuahpui tur thu a lo hrilh.

LESDE minister Lalnghinglova hian Ministry of Skill Development & Entrepreneurship (MSDE) secretary Atul Kumar Tiwari chu sorkar laipuiin industrial training institute (ITI) tihchangtlun a kalpui mek chungchanga Mizoram dinhmun a sawipui a; MSDE hnuaia Pradhan Mantri Kaushal Vikash Yojana (PMKVY) 4.0 kaltlanga Mizoram ṭhalai 10,220 thleng huam thei skill development training kalpui mek an thlirho bawk.

PMKVY hnuaiah Mizoram tan special project siamin, Mizo ṭhalaite tuina leh thiam zawng mila skill development training kalpui turin hmalak ni se, an ti.

Lalnghinglova Hmar hian Mizorama infiamna lam hmasawnna turin NITI Aayog, ADB leh HCL Foundation hotute a kâwm bawk a; NITI Aayog programme director Yugal Joshi, adviser for Northeast ni bawk hnenah Mizoramin infiamnaa hmachhawp a neihte a hrilh. NITI Aayog hotute chuan, Mizoram sorkarin ministry hrang hranga project a thehluhah NITI Aayog puihna leh thurawn an mamawh chuan pui tura an inpeih reng thu an sawi.

ADB country director Mio Oka chu SYS Minister hian Olympic Games 2036 leh National Games 2032-a Mizoram hmathlir a sawipui. Mizoramah sports kaltlanga khawpui hmasawnna, tourism, zirna leh skill development lian tham kalpuina remchang a awm thu leh hmunhma tur sorkarin a neih thu a thlen a; Mizoramin National Games 2032 thleng tura hmathlir a neihte tihlawhtling turin ADB-a Mizoram sports project awm mek chu chak zawka kalpui turin a ngen.

ADB hotute chuan, zau zawka inràwn-khawm turin December thla chawhma lamah ‘Consultation Mission’ neia Mizorama zin an tum thu an lo hrilh a ni.

Lalnghinglova Hmar hian Thawh-ṭanni vek khan Mizoram House, Chanakyapuri-ah HCL Foundation (Sports) hotute a kâwm a; Mizoram tuam chhuaka sports coaching kalpui tur hmachhawp leh Mizoram sorkar hnuaia sports academy awmte tihchangtlunnaa thawhho dan tur a sawipui a ni.