16th Finance Commission-a thlen tur sorkar ruahmannate sawiho
Chief minister Lalduhoma, Finance enkawltu hoin nimin khan CMO conference hall-ah sorkar hotute'n 16th Finance Commission-a thlen tur Mizoram sorkar rawtna leh ruahmannate an sawiho. CM chuan, department-te project chu a vaiin an thun vek theih dawn loh thu leh, sum dawn zat milin mamawh zual an thlan dawn thu a sawi.
CM Lalduhoma chuan, 16th Finance Commission aṭanga sum hmuh beisei a tam loh thu a sawi a, "Tun hmaa specific grant kalpui tawh dan ang thoa rawn kal tur a nih hmel avangin sum hmuh beisei a tam theih hmel loh. Department hrang hrangte'n project in rawn thehluh hi kan thun vek thei dawn lo tih kan hriat a ngai a, sum kan dawn theih tur àwm tâwka kan ngaih behchhanin kan mamawh zual chauh kan thlan a ngai dawn a ni," a ti.
Finance commissioner Vanlaldina Fanai chuan ṭhutkhawm chhan tlangpui sawiin, sorkar official bik chauh an inko khawm rih a, hun remchang hmasaah tlawmngai pawlte nena sawihona hun buatsaih leh tum a nih thu a sawi.
Ṭhutkhawmah hian 16th Finance Commission chhunga state specific grant hmanga thawh tura department-te project thehluh enho a ni a; project thehluh ṭhenkhat, tun ṭuma la tarlan lohte chu a rang lama enho leh ni se, an ti. 16th Finance Commission hotute'n Mizoram an rawn tlawh huna lo dawnsawn dan tur an ngaihtuah nghal bawk.
16th Finance Commission-a thlen turte sawihonaah hian adviser to CM (Finance) TBC Lalvenchhunga, MLA bakah, state specific grant atana project thehlut department changtu minister-te leh official te, Planning & Programme Implementation department leh Finance department hotute an tel a ni.
FINANCE COMMISSION
* Kum 5 chhunga sorkar laipui leh state sorkarte'n chhiah (tax) an insem dan tur bithliahtu atan India Constitution Article 280 anga din a ni.
* 15th Finance Commission a tawp dawn hnai a, April 1, 2026 aṭangin 16th Finance Commission rawtna anga kal a ni tawh dawn.
* 15th Finance Commission chhunga Mizoram sum hmuh, Revenue Receipts 42% chu sorkar laipui Grant in Aid aṭanga dawn a ni a, a dang 42% chu Share of Tax aṭanga hmuh a ni. A la bâng zawng chu own tax revenue aṭangin 9% leh own non tax revenue aṭangin 7% a ni.
* Grant in Aid huang (component) aṭanga Mizoramin a dawn chu centrally sponsored scheme leh Finance Commission grant 47% ve ve a ni a, 6% chu thil dang aṭanga hmuh a ni.
* 15th Finance Commission-in Share of Tax-a state share atana a bituk chu 41% a ni.