Chhanzova'n Zawlbûk Titi a buatsaih

Minister of state B Lalchhanzova chuan nimin khan Khawbung Zawlbûk tualah Zawlbûk Titi hun an buatsaih a, Khawbung mipui leh pawl aiawhte zawhna a chhân bakah, a enkawl department hmalaknate a hrilhfiah.

B Lalchhanzova chuan, mipuite'n Assembly House-ah thu an sawi thei lo a, sawi duh an neih ṭha tak takte minister leh MLA-te'n an ngaihthlak tam hian mipui duh danin ram rorelna a kal thei tih a sawi a; mipui sorkarna a awm theih nan Zawlbuk Titi buatsaih an nih thu a sawi.

Inkawmhonaah hian mipuiin ration card chi hrang hranga ramri kham dan leh buhfai man tihsan chungchang, ram periodic patta leh house pass chungchang leh thil danga an hriat duhte an zawh bakah, thuràwn an neihte an sawi a ni.

B Lalchhanzova chuan, mipuiin sawi duh tam tak an nei ṭhin tih sawiin, "Ram hruaitute hian mipui hi kan ngaithla fo tur a ni a, vei zawng sawi vena remchang nei lo thingtlanga chengte kal chilha inpawh tlang taka inkawmhona huaihawt fo ka tum a ni," a ti.

Minister B Lalchhan-zova hian Khawzawla FCI kudam sakna tura ruahman te, Champhai district-a buhfai kudam hrang hrangte a tlawh nghal a; Khawbung lalte hriatrengna atana football tournament a hawng bawk.