Dan pawisaklohna ata harh chhuak turin ZPM Ṭhalai-in MNF Treasurer an ngen

ZPM Ṭhalai chuan thuchhuah siamin, November 18, 2024-a Mizo Hnam Rûna MNF treasurer leh minister hlui Lalruatkima thusawi chu MNF sorkara dan zawm kawnga an lo ngaihtuahawmzia tichiangtu a nih thu an tarlang a; dan pawisaklohna ata harh chhuak turin MNF an ngen.

ZPM ṭhalaite chuan, MNF press release-a tarlan danin, Lalruatkima'n, "ZPM sorkar chu sorkar hnathawkte nêkcheptu, aikal lâk khap, office ṭan hun leh bân hmaa chhuahsan phal lo leh an awmna chin hriat theihna apps an hmang ṭan dawn a, sawrkar hnathawkte an beidawng mek a, MNF sorkar leh hun an nghakhlel hle," tiin a sawi tih an tarlang a, "Mak kan tiin, a ngaithlatu mipui tan a hrilhhaithlak dawn hleah kan ngai," an ti a, minister ni tawh ṭawngkam atan mawi lo an tih thu an sawi.

Mipui sorkar hnuaiah sorkar hnathawkte leh mipui an hlim a, an thlamuang a, hlawh an lak danah pawh an lungawi nia sawiin ZPM Ṭhalai chuan, "ZPM sorkarah ṭhahnemngai taka sorkar hnathawkte an thawh laia dan pawisa lo tura fuihpawrh MNF-te hian sim se kan duh," an ti.

ZPM Ṭhalai chuan, "Sorkar hnathawkte rilruah rinawm lohna leh zelthelna rilru tuh duhna thinlung hi MNF hruaitu leh minister hial ni tawh Pu Lalruatkima hian pu tawh lo se. Office kalphung, dan leh dûn hriatna kawngah leh dan pawisaklohna ata harh chhuak turin kan ngen a ni," an ti bawk.