Lungleiah ward/veng fai dan endik

Lunglei Municipal Council (LMC) chhunga ward hrang hrangte fainaa inelna, LMC Award 2024 atana endik thawh hnihna chu nimin khan neih a ni.

Endiknaah hian LMC secretary Lalrinawma hoin YMA, Lunglei Sub-Headquarters leh MHIP Sub-Headquarters aiawhte an thawk chhuak a; Pûkpui, Zotlang, Serkawn, Zohnuai, Bazar Veng, Venglai, College Veng, Venghlun, Rahsi Veng leh Sazaikawnte endik a ni.

LMC Award 2024 fai intihsiakna hi July 1, 2024 khan kalpui ṭan niin, kum tluana inelna tur a ni a; January 2025-ah result leh lawmman sem theih beisei a ni.

Ward fai berin Rs 3,00,000, pahnihnain Rs 2,00,000 leh pathumnain Rs 1,00,000 an dawng dawn a, trophy an dawng tel bawk ang. Ward pakhat hnenah consolation prize Rs 30,000 hlan tum a ni bawk.