Kan sorkàr chuan mahni inhai vûr tumte tan Congress nih a rem lo - Lal Thanzara

Mizoram Pradesh Congress Committee president Lal Thanzara chuan, Mizoram mipui an rethei tawh lutuk nia sawiin, Congress an sorkar leh a nih chuan mahni inhai vûr tumte tan Congress nih a rem tawh lo niin a sawi.

Congress President hian November 18 leh nimin khan Suangpuilawn leh Vanbawng khuaah thu a sawi a, "Congress kan sorkar leh a nih chuan mahni inhai vûr tumte tan Congress nih a rem tawh lo. Kan ram mipui an rethei rei tawh lutuk a, anni hi chhanchhuah an ngai. Mipui rawngbawl tura min thlan kan nih angin mipui rawngbawl turin Congress kan sawrkar chuan hma kan la dawn a ni," a ti.

Lal Thanzara chuan, "ZPM hi hman ni lawka sorkar an ni a, sawichhiat hi kan tih tur a ni lo," a ti a; mahse, inthlan hmaa an intiamna anga an kal lohnate sawi chhuah chu opposition an nih anga an mawhphurhna a nih thu a sawi.

ZPM chu sawhthing lei turin an intiam nia sawiin Lal Thanzara chuan, "Chu mi beisei chuan chhungkaw tam takin an chíng a, sawhthing chíngtute beiseina hi hlawhtling se kan duhsak em em. Mahse, sorkar chuan 'Sawhthing hi sorkarin kan lei ang kan ti lo' an tihsan leh ta mai a, sawhthing hi an lei thiam leh lo ang tih a hlauhawm hle. Sawhthing chingtute beiseina hi tithlawn lo turin kan ngen a ni," a ti.

MPCC President chuan, NLUP-in thingtlang mipui lung a lên nia sawiin, "Kan hotute'n ruahmanna an siam ang a, kan kalpui leh ngei ka ring," a ti a; Manipur-a Zo hnahthlakte tawrhna chungchanga Home Minister chet dan leh inthlan hmaa a sawi dan chu a inpersan hle niin a sawi bawk.