Essay inziahsiak lawmman sem
Directorate of Science & Technology chuan Covid-19 pual essay inziahsiak an buatsaih result puan leh lawmman sem inkhawm nimin khan an hmunah an buatsaih a, Planning (Science & Technology) secretary Dr C Vanlalramsanga’n a hmanpui.
Inkhawm hi chief scientific officer Dr RK Lallianthanga’n a kaihruai a; Dr C Vanlalramsanga chuan, Covid-19 do nan science, technology leh innovation a pawimawh thu sawiin, "Innovative idea awm lo se la chu supply chain a buai ang a, chu chuan mihring nun leh ram ei bâr zawnna nasa takin a ngawng dawn. Scientific avangin mumal takin ram a la kal thei a ni," a ti.
Intihsiakna thupui chu 'Covid-19 do nana science pawimawhna' tih a ni a, essay 101 lut zingah Ramchanmawia, Kanhmun pakhatna niin, Dr Ruthi Lalneihkimi, Ramthar Veng, Aizawl leh T Lalrinzami, Chawlhhmun te pahnihna leh pathumna an ni.