Parking-a leng zat bithliah aia tam dah ṭhinna hmunte endik a ni dawn

Aizawl Municipal Corporation (AMC) Committee on Control of Parking & Collection of Parking Fees chuan Aizawla parking area hrang hranga lirthei leng zat bithliah aia tam lirthei hnawhna hmunte an endik dawn a; two wheeler taxi stand-ah pawl member ni lote pawh din theih a nih thu an sawi.

AMC Control of Parking & Collection of Parking Fees hotute chu AMC deputy mayor R Thanglura hoin nimin khan AMC conference room-ah an ṭhu a; Aizawla zan lama parking kalpui dan tura te, maxicab stand chungchang te, Berawluia city bus terminal luah dan tur te, Aizawla two wheeler taxi stand chungchang te, parking area chei ṭhat dan tur leh chhinchhiahna siam dan turte an rêl.

Ṭhutkhawmah hian, Aizawla parking area siam hrang hrangte chu tute emaw tan bik hauh a remchang lo tih tarlan a ni a; "Hmun ṭhenkhatah two wheeler taxi-te'n an member ni lo din an phal lo ṭhin chu ti tawh lo tura hriattir ni se," an ti.

Meeting-ah hian Aizawlah khualzin tam takin zana lirthei riahna/dahna tur an mamawh ṭhin thu sawi a ni a, loh theih loh thila zan riah ngaite tana ruahmanna mumal zawk siam dan tur sawiho a ni. Aizawl City Traffic Police leh local council-te nen ṭha taka kalpui tum a nih thu leh, Aizawla veng 28-in ruahmanna an neihte AMC-ah an thehluh tawh thu tarlan a ni.

Ṭhutkhawmah hian executive corporator B Lalawmpuii, corporator pathum - C Lalchhandami, Christina Roluahpuii Sailo leh David Zohmangaiha te, AMC-a parking viltu officer te, Aizawl City Traffic Police leh State Transport Authority aiawhte an tel.

ṬHUTKHAWMA TARLAN TLANGPUI

* Aizawla parking area siam hrang hrangte chu hauh bik a remchang lo.

* Hmun ṭhenkhata two wheeler taxi-te'n an member ni lo din an phal lo ṭhin chu ti tawh lo tura hriattir ni se.

* AMC parking area hrang hranga lirthei leng tur zat bithliah aia tam inhnawhte endik ni se.

* Maxicab-te Aizawla zan riahna tur AMC-in ruahmanna a siam a, an duh duhna hmunah dah mai loin, AMC hmun ruahmanah riah zel turin maxicab neitute leh driver-te ngen an ni.

* Aizawl city bus-te tana terminal siam chu hman theih a nih tawh vangin hman ṭan thuai ni se.