KHAWTHLIR

Kai App inzirtir

IPR department-a officer-te leh directorate-a thawkte tan nimin khan IPR auditorium-ah 'Kai App' hman dan tur zirna buatsaih a ni a, IPR joint director K Vanlalsangi'n a hawng. Kai App hi application chi khat, pisa kainaa hun vawn dik lehzual theihna tura sorkar hnathawkte tana hman tura Mizoram sorkarin a duan a ni. Tun dinhmunah Kai App-ah hian office inziak lut 409 a awm tawh a, hmangtu inziak lut mi 8,170 vel an awm tawh a ni.

Mei zu mi 5 man

Aizawl District Anti Tobacco Squad chuan nimin khan MINECO huam chhunga pisa hrang hrangah phal lohna hmuna mei zu an awm leh awm loh an endik a, phal lohna hmuna mei zu mi panga manin, pawisa an chawitir.

AR-in heroin man

Assam Rifles chuan November 18, Thawhṭanni khan Champhai Zote huam chhungah heroin no. 4 gram 220.130 an man a, a neitua puh mi pahnih - Biakhmingthangi (59) leh Lalremruati (45), Champhai ve vete an man bawk.

Nursing training

Health & Family Welfare minister Lalrinpuii chuan nimin khan Planning conference hall-ah nursing administrator-te puala training buatsaih a hawng. Lalrinpuii chuan, "Kan hnathawhna kawng engkimah training hi hman tlak lehzuala min chhertu, kan hnathawh tisâwt lehzualtu a ni," a ti. Training hi vawiinah chhunzawm a ni ang a, naktukah zawh a ni ang.

PM Poshan

Naupangte chawchhun pekna, PM Poshan Champhai district-a kalpui ṭha zualte hnenah nimin khan chawimawina hlan a ni. Champhai district-a PM Poshan kalpui ṭha ber chu Mualkawi Primary School a ni a, Zawlsei Middle School leh Kanan Middle School-te'n an dawt. PM Poshan hi Champhai district-a sorkar sikul 140 chuangah kalpui a ni.

MRB building thar

Kolasib bawrhsap Robert C Lalhmangaiha chuan nimin khan Kolasib Diakkawnah Mizoram Rural Bank, Kolasib Branch building thar a hawng. Tun dinhmuna MRB Kolasib Branch credit deposit (CD) ratio chu 90.15% a nih thu tarlan a ni.

Pass dilna ngaihtuah

Kolasib bawrhsap Robert C Lalhmangaiha kaihhruaiin November 18, Thawhṭanni khan DC conference hall-ah Kolasib Land Committee an ṭhukhawm a, house pass dilna 24 leh land lease 37 dilna lutte ngaihtuah a ni. VC-te'n an dinhmunte an sawi chian hnuah dilna lut ṭhenkhat chu recommend tura pawm a ni a, a ṭhen chu ennawn leh tura dah a ni.