Aizawl hmun thenkhata CCTV dah thar Home Minister-in a hawng

26th May, 2015

Aizawl khawpuia Closed Circuit Television (CCTV) vuah thar leh Aizawl SP Office-a CCTV Control Room thar chu nimin khan Home minister R Lalzirliana'n a hawng. Home Minister chuan Aizawl khawpui chhunga CCTV dah a nih chhan chu, khawpui himna atan leh sualna pung zel do letna atan a nih thu a sawi.

CCTV leh a Control Room hawn zawha Aizawl SP Conference Hall-a inkhawmah thu sawiin R Lalzirliana chuan, "Sualna a pung zel a, heng sualnate do let hi dan leh thupek kengkawhtute mawhphurhna a ni. Chumi atana pui tur chuan tuna kan thil hawn tak hi a pawimawh hle. CCTV hi sualna hrang hrang dona atan a pawimawh dawn a ni," a ti.

Home Minister chuan, tuna CCTV vuah tawh chu a bul ṭanna chauh a ni tih sawiin, "CCTV hi vuah belh zel tum a ni. A hmanrua pawh tihchang-tlun zel a ni ang," a ti a; CCTV Control Room pawh Aizawl khawpui chhunga police station zawng zawngah dah tum a nih thu a sawi.

CCTV enkawltute'n thurûk leh mi hriat ve loh tur chite an vawn ṭhat a pawimawh dawn tih sawiin R Lalzirliana chuan, "Zan lamah pawh hmun hrang hrang a lang vek dawn a, miin, dan an bawhchhiat loh leh law and order tibuai zawng ni loin hun an lo hmang thei. Chu'ng zawng zawng chu mipui hmuh theih tura puanzar vek a ṭul lo ang," a ti.

Home Minister chuan, sorkar thilte mahni ta anga ngai thei lo an la awm avangin sorkar thil a tlo lo bik ṭhin tih sawiin, CCTV vuahte chu khawpui himna tur a ni tih hria a, mahni ta anga en tur leh a tichhe zawnga che lo turin mipuite a sáwm a ni.

DGP Dharmendra Kumar pawhin thu sawiin, khawvel hmun hrang hrangah CCTV chu sualna, lirthei che vêl leh mipui thununna atan hman ṭhin a ni tih a sawi a, "Crime a thlenin a do letna atan a ṭangkai hle. CCTV vang hian thubuai tam tak chu chinfel a ni tawh. Buaina a awm chuan CCTV-a duty-te'n police an hrilh ang a, anni'n an chingfel zung zung thei dawn a ni," a ti.

CCTV hawnna inkhawm hi Home department-a additional secretary Lalbiakzama'n a kaihruai a, CCTV buntu KSJ Dynamics Security Pvt. Ltd. hotu Karandeep Singh chuan an hnathawh dan a sawifiah.

Aizawl khawpuia CCTV vuahna atan hian Ministry of Home Affairs chuan March 30, 2013-ah cheng nuai 1,265 a pawm a, pawisa zawng zawng chu Mizoram sorkarah pek a ni tawh.

A thawh khatna atan cheng nuai 395.5 hmangin Aizawl khawpui hmun 10-ah CCTV camera 56 vuah a ni tawh a, hmun 23 dangah vuah leh tur a ni. CCTV Control Room chu Aizawl SP Office-ah chiah dah a la ni a, police station dangah pawh la dah tum a ni.