Zirlai 1,130-in migration certificate la tawh

Mizoram Board of School Education (MBSE) hotute chuan, Mizo zirlai, Mizoram páwna zirna an chhunzawm turte’n an lak ṭhin, migration certificate chu a kum telin latu an pung zel tih an sawi a, kuminah zirlai 1,130-in an la tawh tih Vanglaini an hrilh.

MBSE hotute’n Vang­laini palai an hrilh danin, kum 2013 khan HSLC zir chhuak, Mizoram páwna zirna chhunzawm tura migration certificate la zat chu mi 553 an ni a, kum 2014-ah chuan mi 521-in an la. Kumin 2015-ah zirlai 378-in migration certificate an la tawh a; provisional certificate la 245 an awm bawk.

Higher Secondary School Leaving Certificate exam pass chhuak zingah kumina MBSE aṭanga migration certificate la chhuak chu zirlai 752 an tling tawh a; kum 2013-ah zirlai 771 leh kum 2014-ah zirlai 1,770-in an la chhuak a ni.

Kumin bika HSLC leh HSSLC zir zo, MBSE aṭanga migration certifi­cate la tawh zawng zawng chu zirlai 1,130 an ni.