KHAWTHLIR

Translation Book Award thlang fel
Mizo Writers Association (MWA) chuan kum 2014 chhunga ṭawng danga lehkhabu ziah, Mizo ṭawnga lehlin zinga ṭha berah 'Pathian thlamuanna' tih lehkhabu, Zothanmawia Khiangte-in Billy Graham-a ziah 'Peace with God' tih a lehlin chu a thlang. Award hi May 29, 2015-a MWA Annual Meeting-ah hlan a ni ang.

Zirlai lawmpui
Republic Higher Secondary School Alumni chuan nimin khan Republic HSS aṭanga kumina HSLC leh HSSLC exam-a ti ṭhate chawimawina hun an hmang a; zirlai hlawh­tlingte chu lawmpuina thilpek an hlan. Republic HSS-ah hian kum 2015 atan zirlai H/S section-ah 300 vel leh HSS section-ah 500 vel an awm a ni.

Tleirawlte Puitu
VLC Vanlalhriatrenga lehkhabu ziah, ‘Tleirawlte Puitu’ tih chu nimin khan IPR Auditorium, Ai­zawlah UD&PA secret­ary Dr C Vanlalramsanga’n
a tlangzarh.

Kawng enfiah
Champhai Ṭhalai Pawl (CṬP) hruaitute chuan nimin khan kum 2016-a KṬP General Conference hmanna tur New Champhai panna khelmual panna kawng PWD-in an siam mek an enfiah a; PWD hnathawh chu ṭha an tih thu leh fakawm an tih thu an sawi.

Ph.D hmu
Lalhmangaihzuala Khaimeichho s/o K Zatlunga, Khatla South, Aizawl chuan Mizoram University-a Department of Mathematics & Computer Science aṭangin doctor of philosophy a hmu thar a, a thesis title chu 'A Study of Topological Entropy of Chaotic and Symbolic Dynamical Sysytem' tih a ni. R Lalnunmawii w/o Lalthlengliana Pachuau, Electric Veng, Aizawl pawhin Mizoram University aṭangin doctor of philosophy a hmu thar a, a thesis title chu, 'Custodial Care & Rehabilitation of Women in Correctional Institution in Mizoram' tih a ni.