Krismas pual thisen pek rûnpui ṭan a ni

Association for Voluntary Blood Donation (AVBD)-in blood bank hrang hrangte nen ṭanghoa December 1-31 chhunga 'Krismas pual thisen pek rûnpui' an huaihawt tur chu nimin khan ṭan a ni a, Civil Hospital, Aizawl Blood Bank-ah Health & Family Welfare Board vice chairman Dr ZR Thiamsanga, MLA-in a hawng.

Dr ZR Thiamsanga chuan, thisen petute zawng zawng chungah lawmthu sawiin, thisen petu páwl zawng zawngte hmalakna a lawmawm a tih tak zet thu a sawi a, "AVBD hmalakna hrang hrangte a ropui tak zet a, an hmalakna avangin thisen pekin hma a sâwn hle a ni," a ti.

Mihring thil neih hlu ber pakhat chu thisen a ni tih sawiin ZR Thiamsanga chuan, "Nunna chhan nan a pawimawh tak zet. Voluntary donation 100% ni thei turin ṭang tlang ila, kan Kristianna nen pawh a inhmeh em em a ni. Kan mimal hun pawimawh bikahte pek nacháng kan hre zelte hi a lawmawm hle. Mite tan malsawmna ni turin, mi nunna chhan turin December thla chhung hian thisen rawn pe vek turin ka sawm a che u," a ti a; thisen pe turin mipui a sáwm.

Dr ZR Thiamsanga chuan, blood processing fee lâk ṭhin chu MNF sorkarin a titàwp tih sawiin, "Vawiinah chuan pawisa pek a ngai ta lo a, a lawmawm hle," a ti. Blood bank-a thawktute an fakawm tak zet tih sawiin, "Indaih lo chung chungin hmun hrang hrangah camp neiin an kal ṭhin a ni," a ti a; thawktu dah belh a nih theih nan Chief Minister leh Health Minister-ah hma a lâk dawn thu a sawi.

AVBD president C Lalnunnema chuan, December thla chhungin Krismas pualin thisen pek rûnpui an huaihawt tawh ṭhin tih sawiin, "Kum tinin Krismas leh kumthar vuakvet laiin thisen petu an tlem ṭhin a, chutih laiin, thisen mamawhtu an pung zawk mah emaw tih tur a ni. AVBD chuan blood bank-te nen ṭanghoin Krismas puala thisen pek rûnpui hi rinnain kan buatsaih ṭhin a ni," a ti.

AVBD President sawi danin, kum 2019-a Krismas puala thisen pek an buatsaihah Civil Hospital, Aizawl bikah mi 458 leh Synod Hospital-ah mi 69-in thisen an pe a, a vaiin unit 527 a ni. Kum 2019-20 chhung khan Mizorama voluntary blood donation chu 90.91% a ni a, kum 2020-21 kal mekah April-October chhungin 91% a ni bawk.

Krismas pual thisen pek rûnpuiah thisen pe turin AVBD chuan mi zawng zawng an sáwm a; Aizawl bakah, district hrang hranga blood bank-ah pek theih a ni. Thisen petute chu ei leh in tur tuihnai bik tak pek ṭhin an nih dawn thu an sawi.