LADC CEM V Zirsanga leh midang pangate ACB-in an chhui dawn

Lai Autonomous District Council (LADC)-a chief executive member (CEM) V Zirsanga leh midang pangate chu dik lo taka middle school zirtirtu leh thawktu dang 37 laah leh cheng vbc. 3 chuang tihchingpena puh an nihnaah Anti Corruption Bureau (ACB)-in an chhui zui dawn.

LADC-a M/S zirtirtu leh thawktu dang 37 laknaah thil dik lo a awm nia ngaiin M Lalrammawia, Lawngtlai chuan October 3, 2013-ah ACB-ah FIR a thehlut a, ACB chuan bawhzuiin, preliminary inquiry an ti a ni.

Premilinary inquiry aṭanga a lan danin, M/S-a thawk tur lak hun laia LADC-a Education changtu executive member (EM) leh tuna LADC CEM ni mek V Zirsanga leh LADC-a Education officer H Lalruatkima, Art & Culture officer B Vanlangheta, DEO Lal­duna Chinzah, DEO-a cashier Ramengzauva, Middle School Teachers Association sub-hqrs. Lawngtlai president NC Muankima leh secretary C Lalchawiliana te chu thil dik lo tia puhnaah an inhnamhnawih ngeia hriat a ni.

ACB chuan mi parukte lakah criminal case an ziak lut a, Aizawl District Court pawhin ACB chu mi parukte chhui chiang turin ACB hnenah phalna a pe tawh a ni.

ACB prelimimary inquiry aṭanga a lan danin, LADC DEO leh a thurualpuite chuan a tlém berah sorkar sum cheng vbc. 3.19 an tichingpen niin a lang a, chu’ng sum aṭang chuan V Zirsanga hnenah cheng nuai 21 an pe ve tih tarlan a ni.

Hetih lai hian, LADC CEM V Zirsanga chuan, zirtirtu lak leh sum tih­chingpena puh a nihnaah thiam lohna a nei lo nia sawiin, M/S zirtirtu leh thawktu dang 37 laknaah thuneihna (appointing authority) a nei lo niin a sawi.