Mizoram House sak dan MNF-in mak a ti

MNF party chuan thu­chhuah siamin, New Town, Kolkata-a Mizoram House thar sak dan leh a satu leh thil dang khawihtu thlan dan chu mak an tih thu an tarlang a, “House sak dan leh thawktute inpeizâwnnaah puanhnuai thil a awm em ni,” an ti.

MNF chuan, Kolkata-a New Mizoram House sa tura rawih chu M/s Gagan Construction Pvt. Ltd., Azimagang House, 7 Camac Streeet, Kolkata - 700017 an ni tih sawiin, original estimate chu Rs. 11,29,00,000 a ni a, revised estimate chu Rs. 21,14, 30,000 a ni,” an ti a; a tira sak zawh zawh hun tura ruat chu July 1, 2011 a nih laiin, an thawh zawh hun tak erawh chu March 1, 2013 a nih thu an sawi.

MNF tarlan danin, House páwn lam (external) electrification titu contractor chu Gagan Construction Pvt. Ltd., 156/A, Lenin Sarani, Kolkata a ni a, a siam nan Rs. 2,14,51,770 sên a ni. SITC of Fire Fighting System supply-tu pawh Gagan Construction Ltd. 156/A, Lenin Sarani, Kolkata bawk a ni a, Rs. 47,22,330 sên a ni.

Air conditioner supply-tu chu Gagan Construction Ltd., 156/A, Lenin Sarani, Kolkata niin, Rs. 1,60,00,000 hman ral a ni a; Gagan Construction Ltd. tho hi Mizorama CCTV vuah tur (CCTV Surveilance Security System) supply tura thlan niin, senso chu Rs. 29,74,334 a ni.

MNF chuan, “Vai supplier-te nena inthurual ṭhinte hian Kau-Tlabung leh Tuipanglui ang mai hian mual min liam san lo teh se,” an ti.