DIG (SR) leh Lunglei media-te inkâwm

Deputy Inspector General of Police (Southern Range) Joseph Lal­chhuana chuan nimin khan a pisaah Lungleia thuthar thehdarhtute a kâwm a, Lunglei district-a police dinhmun leh hma thar lak an tum dante a hrilh.

Police leh media inkarah inkungkaihna leh thawhhona ṭha tak awm a pawimawh thu sawiin, Joseph Lal­chhuana chuan, “A bik takin chhiatrupna thil a thlen emaw, mipui tithlaphâng leh tichîâi thei thil a thlen emawin boruak muanawm siam theitu ṭangkai tak chu media an ni,” a ti.

Joseph Lalchhuana chuan, police-ah inthununna dah pawimawh hmasak ber a ni tih sawiin, “Police zing­ah inthlahdah deuh an awm a, complaint a lut a nih chuan, mimal leh mipui rilru tina khawpin police hotute’n an hnuaia mite an chhan ngai lo ang,” a ti.

DIG chuan, police-te pun an nihin a hma theih ang bera an thlenna tur thleng thei turin ṭan lak mek a ni tih sawiin, chu­tiang tur chuan mock drill-te pawh vawi eng emaw zat neih a nih tawh thu a sawi a, “Lung­lei khawpui chhungah chuan koh an nih aṭangin minute 20 chhungin an thleng thei tura beisei a ni a, Lunglei pawnah chuan koh an nih aṭanga minute 10 chhungin police station chhuahsan a, a hmun pan thei tura beisei a ni,” a ti. Lungleiah lirthei a pun zel avangin parking regulations leh parking fee khawnte khawng lehzuala kenkawh a ṭul thu a sawi bawk.

DIG Joseph Lal­chhuana’n Lungleia press mite a kawmnaah hian Lunglei SP Zosang­liana, additional SP J Lalmuankima leh SDPO B Laldingngheta ten an ṭawiawm a ni.

DIG(SR) hnuaiah hian Lunglei district bik­ah police 275 awm­in, police station paruk, outpost pahnih leh beat post pakhat a awm a; Lawngtlai district-ah police station panga, outpost pathum a awm a; Saiha district-ah police station pathum leh outpost pathum a awm.