Hnathawhna hman a awm lo - Chief Minister

Chief minister Zoram­thanga chuan, MNF-in sorkarna an siam hnuah chhan hrang hrang avangin hmasawnna hna thawhna hman a awm loh thu a sawi.

IPR directorate-a 'Art & Culture Department Zaipawl Album Vol-I' tlangzarhnaah thu sawiin Zoramthanga chuan, "Kum 2018-a sorkarna kan siamin Krismas-in a zui a, kum tharah hma kan la ṭan a, Lok Sabha MP inthlan model code of conduct vangin a chêt leh theih loh. Chumi hnuah hmasanna hna thawh hleih theih lohin fûrin a zui leh a ni," a ti.

CM Zoramthanga chuan, fûr a zo a, hna thawh tak tak hmain Covid-19 a lèn leh thu sawiin, "Covid-19 avangin a chêt theih ta reng reng lo a ni," a ti a; programme leh project duh anga an kalpui theih loh thu a sawi.

Chief Minister chuan, Art & Culture department tihlen a duh thu sawiin, "Education department kal kawp dante zawn a ṭha. Language Develo­pment Board lian tak din rilruah a awm. Naupang zawkte'n an hmelhriat tawh loh hlate kan rochun zel a pawimawh. Kan hnam nihphung hi kan humhalh a ṭul a, kan hla leh ṭawngte hi thehdarh a ngai. Sum pawh a ṭul angin kan sanction zel ang," a ti.

Art & Culture minister R Lalzirliana pawhin thu sawiin, khawvel pumpuia boruak khirh tak awm mek karah Mizoram pawhin hri laka him turin nasa takin hma a la a, hripui chungchanga Mizoram dinhmun chu ziaawm viaua a lan thu a sawi.