KHAWTHLIR

AVBD huaihawt 'Krismas pual thisen pek rûnpui' ṭan ní, nimin khan Mizoramah thisen unit 67 pek a ni. Civil Hospital, Aizawlah mipa 27 leh hmeichhia 11-te'n thisen unit 38 an pe a, An zingah NSS hminga pe - Zirtiri College zirlai 20, PUC zirlai 10 leh Aizawl North College zirlai pariat an tel. Champhai District Hospital-ah Champhai College NSS hmingin mipa 11 leh hmeichhia pariatin an pe a; Mamit Hospital-ah Mamit College hmingin mipa panga leh hmeichhia pali leh, Kolasib-ah CZ HSS NSS hmingin mi pathumin an pe bawk.

Mamit bialtu MLA H Lalzirliana chuan nimin khan a biala Rawpuichhip khaw chhunga kawng siamṭhat mek leh Rawpuichhip aṭanga National Highway panna tur kawng siam mek a hmunah a enfiah. H Lalzirliana chuan, Rawpuichhip khaw chhung kawng siam mek chu ṭha zawk leh changtlung zawka siam a nih theih nan sorkar aṭangin cheng nuai 20 dawn belh a nih tur thu a sawi.

SRH-ZMC-ah nimin khan Covid-19 vei mi pahnih dah luh an ni a, anni nen Covid-19 vei mi 30 enkawl mek niin, an zingah kum 60 chung lam panga leh kum 14 hnuai lam pathum an tel. Mi 30 zinga pakhat chu ICU-ah enkawl niin, oxygen pek mek a ni a; mi dang zawng Isolation ward-ah an awm a, chu'ng zinga pali chu oxygen pek an ni bawk.

State Election Commission (SEC) thuchhuak angin, Aizawl Municipal Corporation (AMC) Electoral Rolls Summary Revision, 2020 neih tura hman tur Draft Electoral Roll chu nimin khan tar chhuah a ni.AMC electoral roll ennawnnaah hian December 2-5, 2020 chhungin hming paih, thun thar, siamṭhat ngai leh insawn duhte tan dilna thehluh theih a ni a, local level officer hnenah thehluh tur a ni. Dilna lutte chu December 7-12 chhungin MERO/AMERO-ten an endik dawn. Draft electoral roll-ah hian AMC huam chhunga ward 19-ah vote nei mi 2,18,870 awmin, mipa 1,01,675  leh hmeichhia 1,17,195 an ni.