TIPM hruaitute'n party hotute an kâwm

Assam sorkar awpna hnuaia awm Zo hnahthlak péng hrang hrang intél khawmna, Thangram Indigenous Peoples Movement (TIPM) hruaitute chuan nimin khan political party ṭhenkhat hruaitute an hmu a, MZP hruaitute'n an hruai.

TIPM hruaitute hian Mizo Hnam Rûnah MNF vice president Vanlalzawma leh hruaitu dangte an kâwm a, TIPM hruaitute'n Mizoram sorkar enkawlna hnuaia awm an duh chungchanga hmalak dan tur an sawipui a ni.

Vanlalzawma chuan, Thangram lama Zo hnahthlakte'n Mizoram lam an hawi chu MNF party-in lawmawm an tih thu sawiin, "Kum 20 chhung independent suala MNF a rammut chhan pawh kan ram leh hnam tana ti kan ni. Kan party din chhan angin theihtawp chhuahpui zel che u kan duh. Rilru hmun khat púa kan awm phawt a, kan intèl khawm sauh sauh a ṭul. A ṭul angin MZP hruaitute nen thawkhoin hma kan la chhunzawm zel dawn a ni," a ti.

Inkawmhonaah hian, TIPM hruaitute hmalakna chu bawhzui a, a ṭul anga hmalakho zel ni se, an ti a ni.

TIPM leh MZP hruaitute chuan Congress party president Dr Lal Thanhawla chu Congress Bhavan-ah an hmu a; Lal Thanhawla chuan, MPCC dan bu-ah Zo fate Insuihkhawm chungchang ziah lan a nih thu sawiin, "Thangram huam chhunga Zo fa cheng mekte'n Mizoram enkawlna hnuaia awm an duh hi lawmawm kan ti a, MPCC-in tih theih a nei ve a nih chuan a ṭul ang apiang kan ti ve dawn a ni," a ti.

Dr Lal Thanhawla chuan, TIPM hruaitute'n Thangrama cheng mek Zo hnahthlakte chungchanga hma an lakna tichak tura MZP an bèl chu ṭha a tih thu a sawi a; TIPM thil duhah beiseina sang tak a neih thu a sawi bawk.