Sorkarin Selinga in pakhat a ṭhiahsak duh loin khawtlangin kawng an zawh: In ṭhiahsak chhan sorkarin a sawifiah

Selinga NH kawngpui kama in pakhat chu sorkarin khawl hmangin November 19, Thawhlehni khan a ṭhiahsak a, sorkar thil tih dan duh loin Seling khawtlang chuan nimin khan an khuaah kawng an zawh. Nimin vek khan sorkarin insawifiahna tichhuakin, in ṭhiahsak tak dinna ramah sorkarin thuneihna pumhlûm a nei tawh niin a tarlang.

November 19, 2024 chhun khan Aizawl aṭangin bawrhsap pisaa magistrate, Aizawl North SDPO leh police eng emaw zat chu Selingah an kal a; NH kawngpui kama Assam type in pakhata khawsa mek chhungkaw pakhat chu tihluihnain an chhuahtir a, khawl hmangin in chu an ṭhiahsak a ni.

Ina cheng nufate'n an phal lo chung sorkarin a nawr chhuak leh khawl hmanga in a ṭhiahsak duh loh lantir nan Seling khawtlang chuan nimin khan an khuaah kawng an zawh. Kawngzawh hi in ṭhiahna hmun aṭangin an ṭan a, Seling khelmualah khârna hun an hmang. Sorkarin tihluihnaa in a ṭhiah duh loh thu hrang hrangin an au rual a ni.

Kawngzawhah hian resolution an siam a; chu'ngte chu 'Dan loa thuneitute'n in an ṭhiahsak hi kan duh lo,' tih te, 'A rang lamin an chenna in tur sak ṭhatsak leh rawh se,' tih te, "Magistrate lo kalte leh dan loa in ṭhiahsaktu zawng zawngte bâng turin kan phût,' tih leh, "An phu tâwk ang zangnadawmna sorkarin pe rawh se,' tihte a ni.

Hetih lai hian, nimin vek khan Compensation and Land Acquisition (CALA) for NH-06, Aizawl District chuan thuchhuah siamin, in ṭhiah a nih chhan a sawifiah a, "Zangnadawmna latu hming hi Sawihara c/o Laltluangkimi tiin Deputy Commissioner's office record-ah tarlan a ni. The National Highways Act, 1956 under Section 3D/3E-in a tarlan angin sorkar hian he ramah hian thuneihna pumhlûm a nei tawh," a ti.

Seling aṭanga thu dawn danin, in neitute hnenah hian zangnadawmna pek a la ni lo. CALA-in sawifiahna a tihchhuahah pawh assessment tih nawnnaah zangnadawmna pek zat tura chhût Rs 12,38,091 a nih thu a tarlan laiin, zangnadawmna pek tawh a nih thu tarlan a ni lo bawk.

November 19-a in ṭhiah a nih hian Seling khawtlang hruaitute'n in ṭhiah chu a châk lak tlaka ṭhiah a nih theih nan YMA-in an lo ṭhiah chhunzawm turin an ngen a, chuvang chuan sorkar aiawha kalte chuan ṭhiah zo loin an tawpsan a ni. In ṭhiah a nih lai hian a neitu nu a ṭap nasa hle a ni.