Gas home delivery la tih lohnaa mite'n home delivery turin gas an book thei

Aizawla gas (LPG) distributor-te'n an huam chhunga home delivery an kalpui mekna bakah January 2025 aṭangin veng dang pahnih ṭheuhah home delivery an tih belh dawn. Home delivery la kalpui lohna venga awmte'n home delivery an book thei a, an book chuan agency-te'n an pek ngei a ngai.

Gas home delivery chungchangah hian November 19, Thawhlehni khan Aizawl District Consumer Protection Council an ṭhukhawm a, Aizawl DC Lalhriatpuia'n a kaihruai. Aizawla LPG distributor-te chu January 2025 aṭang chuan an huam chhungah tuna home delivery an kalpui mekna bak veng dang pahnih ṭheuhah home delivery kalpui belh tura tih an ni.

Home delivery la kalpui lohna venga awmte pawhin home delivery turin an book thei a, an book a nih chuan gas agency-te'n an pek ngei a ngai tih ṭhutkhawmah hian tarlan a ni bawk.

Sorkar ruahman anga gas home delivery kalpui dan gas distributor-te'n an tarlang a; Zothan Indane chuan an huam chin veng tinah home delivery an kalpui vek tawh thu an sawi.

Home delivery hmalakna vil zui turin additional DC PC Zonuntluangi kaihhruai Monitoring Committee din a ni a; Committee hian gas agency-te home delivery kalpui dan an endik ṭhin dawn a ni.

Ṭhutkhawmah hian Food, Civil Supplies & Consumers department hotute bakah, Aizawla LPG distributor te, Indian Oil Corporation Ltd., Mizoram Consumer Union leh Central YMA aiawhte an tel.

FCSCA website-in a tarlan danin, Aizawl khawpuiah gas distributor 12 an awm a ni.

AIZAWLA GAS DISTRIBUTOR-TE

1. V Neihkunga Gas Agency

2. Biakkungi Gas Agency

3. Vanbuangi Gas Agency

4. Suakchhunga Gas

5. MIZOFED Gas, Aizawl

6. Zopuii Gas Agency

7. Zoram Indane Service

8. BMS Indane Gramin Vitrak

9. Kapliana Indane Gas

10. Caravan Gas

11. M&B Gas Service

12. Zothan Indane Gas