Sorkar bithliah anga hmuhphiah lei duh firm pathum an awm tawh

Chief minister Lalduhoma hoin nimin khan a pisaah Mizoram Agricultural Marketing Board an ṭhukhawm a; Mizoram sorkarin hmunphiah ro hralhna tur rate a bituk anga lei duh firm pathum an awm thu tarlan a ni.

Ṭhutkhawmah hian, sawhthing sawngbawlna atana Sairang Horticulture Centre buatsaih dan tur leh hmunphiah ro lei thei tur firm zawn chungchang sawiho a ni. Hmunphiah ro-ah support price felfai taka kalpui a nih theih nan October 17, 2024 khan Mizoram sorkar chuan hmunphiah ro lei duh tur firm leh an lei ngamna zat te, an lei tam theih zawng turte zawnna (expression of interest) a tichhuak tawh.

Nimin thleng khan sumdawng (firm) 13-in chhànna an thehlut tawh a, chu'ng zinga firm pathumin sorkar rate bituk anga an lei ngam thu an tarlang. Hun tiam chhunga sorkar rate anga chhang ngam dang an awm loh chuan a chhang ngam awm chhun pathum hi sorkar hriatpuia leitu atana ruat (empanel) mai tura ruahmanna siam ni se, an ti.

Sawhthing processing unit kalpuina atan Sairang Horticulture Centre hman diltu company pathum aiawhte nen unit changtlung taka chantir dan tur duan zui a ni bawk.