MYC-ah Congress hun laia hmalakna bâk hmalakna thar a awm lo - MPCC
Mizoram Pradesh Congress Committee (MPCC) chuan thuchhuah siamin, MNF sorkar kum hnih chhungin Mizoram Youth Commission (MYC)-ah Congress ministry laia hmalakna bâk hmalakna thar a awm lo tih an tarlang.
MPCC chuan, Congress sorkar laiin MYC-in ṭhalaite tan hmalakna tam tak a nei tih sawiin, "District hrang hrangah Youth Centre din tumin thui takin hma a la hman a, pawisa pawh NEDP aṭangin Aizawl district tan cheng nuai 500, Lunglei tan nuai 400 leh Serchhip tan nuai 300 dah a ni. October 4, 2018 khan heng district-te tan hian nuai 100 ṭheuh sanction tihchhuah a ni a, sanction tihchhuah hman lohte pawh Planning-in a pawmpui vek hman a ni," an ti.
November 30, 2020-a MYC chairman Dr Vanlalṭanpuia’n Serchhipa cheng nuai 300 sênna tur Youth Centre sakna atana lung a phûm pawh Congress sorkar laia ruahman a nih thu an tarlang. Congress party chuan, MNF sorkar kum hnih chhung hian MYC hmalakna thar sawi tur a tlém hle nia sawiin, "Congress sorkar hmalakna leh ruahmanna siam sa ang zelin an kal thei chauh a ni. Congress sorkarin MNF hun laia lâk MYC hnathawktute a chhawm vek laiin, MNF sorkar thar chuan an sorkar veleh thawktu thar a la nghal vek bawk," an ti.
MPCC tarlan dangte
# MNF sorkarin an hmalakna nia an chhàl, zirlai ṭha zual thlana UPSC exam tumte tana Delhi-a coaching kalna senso tumsakna tur scheme pawh Congress ministry hun laia siam a ni a, CM’s Phoenix Project kal zel a ni a, hemi atan hian Congress sorkar khan cheng nuai 20 a dah.
# Congress ministry khan MYC kaltlangin sipaia ṭang duhte tan training lian tham takin a buatsaih a, UPSC, SSC, CDS, JEE & NEET, etc. exam tumte tan coaching a buatsaih.
# District hrang hrangah Youth Summit & Road Show a buatsaih.
# Mi hlawhtlingte chawimawina Youth Achievers’ Award siam a ni.
# Tuna MYC chairman Dr Vanlalṭanpuia hian chairman a nih hlim, hmalakna a neih hmain sorkar hmasain policy nei mumal loin MYC a kalpui thu leh nasa taka hmalak a tum thu a sawi. Mahse, MNF sorkar kum hnih chhung hian MYC hmalakna thar sawi tur a tlem hle.
# Phai aṭanga COVID-19 vanga Mizo ṭhalai lo hawte eizawnna tur ngaihtuahsak tur anga an insawi chu tun thlengin hmalakna mumal a la awm lo.