Bana Kaih policy-ah political selection ang kha a awm dawn lo - Lalthansanga

Ministry of Cooperation hnuaia National Cooperative Development Corporation (NCDC) bultumin nimin khan Zawlnuam Ṭhuampui community hall-ah Mamit district huapin PMMSY, FIDF & LIFIC chungchang inzirtirna buatsaih a ni. Khuallian, minister Lalthansanga chuan, Bana Kaih policy-ah political selection a awm dawn loh thu a sawi.

Lalthansanga chuan, Bana Kaih policy chu party induhsakna tur a ni lo tih sawiin, "Mipui sorkar a nih avangin mipui náwlpui zar zo theih a ni dawn a, political selection ang kha a awm ve dawn lo. Line department-te'n spot verification neia an zir chian hnuah thlan a nih dawn a, chhungkaw eizawnna atana hma lo lak tawh din thar leh nan hman theih a nih dawn," a ti.

Society kalphung chu Mizo mipuiin an chhhawr ṭangkai a pawimawh thu sawiin Lalthansanga chuan, "Sorkar laipui aṭang hian society kaltlangin hmasawnna hna tam tak a thawh theih a ni. Kan ramah sum ṭhahnem tak a lo lut tawh a, hlawhtlinna erawh kan la hmu tlem em em. Kan tei rei peih a ngai a, vawi leh khata hausak thut kan tumna rilru hi kan paih a ngai a ni," a ti a; Mizoram sorkar lakah sorkar laipui a inhawn thu a sawi.

Lalthansanga chuan, Mizoramah thlai chi hrang a tam thei ang ber thar tura ṭan lak a ngaih thu sawiin, "Sorkar laipui aṭanga scheme lo kalte ṭha taka kan dawnsawn theih nan a dawn thlêng kan lo buatsaih ṭhat a pawimawh," a ti a; sorkar kaltlanga hmasawnna awmte chhawr thiam turin mipui a chah.

Inzirtirnaah hian mithiamte'n Pradhan Mantri Matsya Sampada Yojana (PMMSY), Fisheries and Aquaculture Infrastructure Development Fund (FIDF) leh LINAC-NCDC Fisheries Business Incubation Centre (LIFIC) chungchang mipui an hrilhfiah a ni.