ZPM hi tlân tau awm khawm an ni - Dr R Lalthangliana

MNF senior vice president Dr R Lalthangliana chuan, November 19, Thawhlehni zan khan Saron Veng Local Council House-a Aizawl East-II MNF Block intawhkhawmah thu sawiin, ZPM chu political party hrang hrang aṭanga tlân tau awm khawm niin a sawi.

Dr R Lalthangliana chuan, "ZPM hi political party hrang hrang aṭanga tlân tau kal khawm leh NGO ṭhenkhat awm khawm, politics-a tawn hriat nei lo, chief minister leh an minister-te pawh experience nei lo an ni. Opposition an nih laiin ṭha ber tur leh danglam bik em em tur angin an insawi nasa a, sorkarna dawhkan an kil meuh chuan an rin ang ngawtin thil tih a lo awlsam si lo a, a harsatzia thu sawiin an beidawng ṭan hle a ni," a ti.

ZPM sokar enchhin a fuh lohzia mipui thinlungah a lang mek nia sawiin R Lalthangliana chuan, "Chhiah chi hrang hrang tipungin, oil man an tisang a, ration buhfai card vara late tan a lêt thawkin an tipung. Hengte hian thil man chi hrang hrang a tihsan phah," a ti a; ZPM sokar thar kal dan chu khawsak harsa zawkte tan phurrit niin a sawi.

Dr R Lalthangliana chuan, Sinlung Hills aṭangin Mizoramah politics-a harh tharna a thleng mek nia sawiin, "Nakkum lawkah VC/LC, AMC leh inthlan hrang hrang kan hmachhawn turah ZPM sorkara beidawng mekte hian Mizo hnam party MNF lam hawiin, MNF chu Pathian leh mipui zarah kan tling chho zel dawn. Pathian kan chungah a lawm phawt chuan ram rorelna hi kan kutah a awm leh thuai dawn a ni," a ti.