ZPM sorkar hi leiba hnutchhiah tam ber sorkar a nih a rinawm - MPCC Treasurer

Congress party treasurer Dr Lalmalsawma Nghaka chuan nimin khan Saiphai leh Saipum a tlawhnaah thu sawiin, ZPM sorkar chu leiba hnutchhiah tam ber sorkar a nih a rinawm niin a sawi.

Dr Lalmalsawma Nghaka chuan, Mizorama sorkar lai mek chu sum leh pai enkawlah an hlawhchhan zel dawn nia a lan thu a sawi a, "Mizorama sorkarna siam tawh zingah kan sorkar hrawn mek hian MNF sorkar kal tawh khûmin leiba hnutchhiah hnem ber sorkar a nih mai a rinawm ta hle," a ti.

Sorkar hnathawkte'n an ngaihdan sawi ngam loin, transfer & posting hmanga invaubehna a thleng mek tih thâwm a ring nia sawiin Lalmalsawma chuan, "Kalphung tharah Congress sorkar hun laia thlamuang taka sorkar hna thawk ṭhinte'n ram leh mipui hmasawnna tura zalenna an neih ṭhin ang a awm ta lo hi a pawi hle a ni," a ti a; sorkar hnathawkte chu dikna leh rinawmna lama ṭang zel turin a chah.

MPCC Treasurer chuan, state ṭhenawma buaina aṭangin sorkar laipuiin MNF sorkar leh ZPM sorkar an ngaih pawimawh lohzia leh an ngaihnêpzia a lang chiang niin a sawi a, "MNF leh ZPM party unaute hian MLA inthlana chak nan BJP sum zém an zen an tih ṭhin hi a rinawm ta tulh tulh a ni," a ti.