Selinga in ṭhiahsak an dem

Mizo National Women Front (MNWF) chuan thuchhuah siamin, NH laih mekah Selinga hmeithai Lalhmangaihi in ding lai November 19, 2024-a JCB hmanga nawr chhiatsak a ni chu an dem thu an tarlang a, "Dan chunga léng ang maia hlei lên a, chak lo zawkte nêkchêp leh diriam a ni hi a pawi kan tiin, kan tawrhpui tak zet a ni," an ti.

MNWF chuan, "NHIDCL hnen aṭangin zangnadawmna a dawn tur ang pawh la dawng lo, an khua Seling mipui leh khawtlang hruaitute pawh hrilh lâwkna awm loa Aizawl Addl. DC kaihhruaina hnuaia thuneihna leka rîkrâp a ni hi thil rapthlak tak, Mizorama thleng nawn tawh lo tura kan duh a ni," an ti a; in neitu mittui tla zawih zawih leh ráwl tawpa ṭahna chuan an thinlung a tihnat thu an tarlang.

Centre for Environ-ment and Social Justice (CESJ) pawhin thuchhuah siamin, nimin khan Seling an pan nghal tih an tarlang a; "He thil thlenga inhnamhnawih zawng zawng, in ṭhiahsak a nihna tura order petute thlengin leh dan palzûttu, in ṭhiahna order an dil pawha order copy pek tur nei lo chunga in ṭhiattute thlengin, dan anga hremna na tak an hmuh ngeih theihna turin hma kan la ngei dawn a ni," an ti.

CESJ hruaituite hian Seling VC House-ah VC member-te leh khawtlang hruaitute an kâwm a; in ṭhiah chungchangah dan bawhchhiatna a len tham avangin court sang zawk beng a thlen ngei theih nan hma an lak dawn thu an tarlang a ni.