LESDE Minister leh MSDE Minister inkâwm

Labour, Employment, Skill Development & Entrepreneurship (LESDE) minister Lalnghing-lova Hmar chuan nimin khan New Delhi-a Kaushal Bhawan-ah sorkar laipuia Ministry of Skill Development & Entrepreneurship (MSDE) minister Jayant Chaudhary a kâwm.

Lalnghinglova Hmar hian, Mizo ṭhalaite’n themthiamna hrang hrangah theihna ṭha tak an neih thu te, IndiaSkills Competition-ah pawh medal eng emaw zat lain, WorldSkills Competition-ah Mizoram aṭangin India aiawh pahnih an tel thute a hrilh a; Mizo ṭhalaite theihna hai chhuak tak tak turin Mizoramah skill development centre changkang leh lian tham neih a ṭul thu ziakin a thlen. Union Minister chuan tihpuitlin ngei a tum tur thu a lo hrilh.

MSDE hnuaia Sports, Physical Education, Fitness and Leisure Skills Council (SPEFL-SC) kaltlangin infiamna lam kaihhnawih job role hrang hrangah skill development training a taka kalpui theih dan tur Union Minister hnena ziaka a thehluh tawh chungchang pawh LESDE Minister hian a bawhzui nghal. Hemi chungchangah hian Jayant Chaudhary chuan Mizoram sorkar lehkha thehluh a hmuh tawh a, ṭha a tih thu leh MSDE hnuaia Sports Sector Council-ah a kalphung ennawn mek a nih thu a sawi.

Lalnghinglova Hmar hian November 19, Thawhlehni tlaiah khan Ministry of DoNER secretary Chanchal Kumar pawh a kâwm a; DoNER Ministry hnuaia Mizoram project leh sum dinhmunte bakah, state sorkar anga hmalak ngaite an sawi dun a ni.