MLA-in YLA golden jubilee a hmanpui

Adviser to chief minister Dr Lorrain Lalpekliana Chinzah, Lawngtlai East bialtu MLA chuan November 19, Thawhlehni zan khan Lawngtlai Chandmary Recreational Centre a hawng a; YLA Golden Jubilee lawmna rûnpui leh Young Lai Association (YLA) General Conference vawi 30-na palai lawm inkhawm a hmanpui nghal.

Dr Lorrain Lalpekliana Chinzah chuan, khawtlang leh ram siamṭha turin mi tinin mawhphurhna an neih rualin, ṭhalaite mawhphurhna a sàn bik thu a sawi a, "Chhiat ṭhata khawtlang enkawltu ber chu ṭhalaite in nih avangin nun vawng uluk ang che u. Ram leh hnam dinchhuah nana pawimawh ber chu Pathian ṭih a ni a, kohhran leh sakhaw zirtirna ngaih pawimawh thar a ṭul," a ti.

Lai hnam dinchhuahna atan rinawmna, dikna leh huaisenna vawng nung thar turin MLA chuan kal khawmte a chah a, "Ram leh hnam humhalhna atan Lai hming put uar pawh a ṭul," a ti a; fa neih tam a ṭul thu leh ṭawng, hnam zia leh nihna humhalh kawngah nasa zawka ṭan lak a ṭul thu a sawi.

Dr Lorrain Lalpekliana hian YLA Golden Jubilee Souvenir a tlangzarh a; YLA General Conference vawi 30-na hi November 21, 2024 thleng hman a ni ang.