MUP lengkhawm zai thiam berah Mission Vengthlang Unit thlan a ni

November 19, Thawhlehni khan Vanapa Hall-ah Art & Culture department leh MUP Gen. Hqrs. ten Aizawla MUP unit-te tan Lengkhawm Zai Intihsiak an buatsaih a, Mission Vengthlang Unit pakhatna an ni.

MUP Lengkhawm Zai Intihsiak hi Aizawla area hrang hrangah buatsaih hmasak a ni a, area 13-a pakhatna ṭheuhte Vanapa Hall-ah an intihsiak leh a ni. Pakhatna Mission Vengthlang unit-in Rs 50,000 an dawng a; pahnihna Zemabawk North-in Rs 30,000 leh pathumna Ramhlun Vengthar-in Rs 20,000 an dawng. Unit tel dangte hnenah participation prize Rs 8,000 ṭheuh hlan a ni.

Member kal tam ber Ramhlun Vengthar hnenah Rs 2,000, khuangpu ṭha ber Lalfakawma, Tlangnuam Vengthar (khuangpui) leh Rohmingliana, Mission Vengthlang (khuangte) hnenah Rs 2,000 ve ve, hla hril thiam ber Lalrinsiami Kawlni, Mission Vengthlang hnenah Rs 2,000 pek a ni bawk.

MUP Lengkhawm Zai Intihsiak MUP Gen.Hqrs president Nghaklian-mawia'n a hawng a ni.