Mizoram NHM endik ṭan a ni

National Health Mission (NHM), Mizoram chuan November 19-23, 2024 chhungin 16th Common Review Mission a hmachhawn ṭan. Endikna hi November 19 khan Aijal Club-ah a khuhhawnna hun hman a ni a, nimin khan Kolasib district endik nghal a ni.

16th Common Review Mission atan hian Ministry of Health & Family Welfare aṭangin mithiam 13 an rawn kal a, Lunglei leh Kolasib district-te tlawhin, NHM hnuaia hmalaknate an zir chiang dawn a ni. An zirchianna aṭang hian hmalak leh zelna turte duan leh a ni ṭhin.

Common Review Mission hi Health & Family Welfare ministry-in kum tin a kalpui ṭhin a, kuminah hian endik turin state 17 thlan a ni a, endik tur zingah Mizoram a tel a ni.

Common Review Mission Monitoring Team hian nimin khan Kolasib district-a Health & Family Welfare department hnuaia health centre-te an endik. Kolasib khawpuia Ṭumpui, Kolasib Diakkawn, Venglai East, Vengthar leh Thingdawla health sub-centre, wellness centre, Ayush health & wellness centre leh damdawi-inte an tlawh a ni.