Lt. Gen. Nirbhay Sharma Mizoram Larsap 17-na atan lalut

Mizoram Governor thar Lt. Gen. Nirbhay Sharma (69) chu nimin khan Raj Bhavan Durbar Hall-ah rinawmna thu tiamtira lak luh a ni a; Mizoram state a nih hnua Larsap 17-na a ni.

Governor lak luhna inkhawm hi chief secretary Lalmalsawma'n a kaihruai a; Chief Secretary-in India President Pranab Mukherjee-a'n Lt.Gen. Nirbhay Sharma chu Mizoram Governor atana a ruatna lehkha, Warrant of Appointment a chhiar chhuah hnuah Gauhati High Court judge T Vaiphei chuan rinawmna tuh tiamtirin a la lut a ni.

Larsap thar lak luhna inkhawmah hian chief minister Lal Thanhawla, minister te, parliamentary secretary-te leh MLA-te bakah, sorkar officer ṭhahnem tak an tel. Nirbhay Sharma hi a nupui Jyotsna Sharma leh a fanu Nupur Sharma ten an ṭawiawm a ni.

Lt.Gen. Nirbhay Sharma hi kum 1946-ah Uttar Pradesh khawpui Lucknow-ah a piang a, National Defence Academy-a a zir chhuah hnua kum 1966-ah Indian Army a zawm a; sipai chawimawina PVSM, UYSM, AVSM leh VSM-te a dawng hman. Thiamna lamah M.Sc, M.Phil (Defence Studies) a ni.

Lt.Gen. Nirbhay Sharma hi army officer a nih chhungin posting hmun pawimawh ber bera ngaih hmarchhak state-te leh Jammu & Kashmir-ah a hun tam zawk a hmang a, a hna chelh hnuhnung ber chu Corps Commander and Security Advisor to the Government of Jammu & Kashmir a ni.

Kum 1971-a India leh Pakistan indonaah te, jammu & Kashmir-a mi firfiak beihna hrang hrangah te, Kargil War-ahte a tel a; Naga helho nena remna siam kawngah pawh a bul tumtute zinga mi a ni. Army headquarters-a Director General (Perspective Planning) a nih laiin 'Army Vision 2020' duannaa sûlsutute zinga mi a ni bawk.

Kum 40 chhung sipaia a ṭan hnuah a pension a, chumi hnuah UPSC member-ah ruat a ni. May 29, 2013-ah Arunachal Pradesh Governor atan lak luh a ni a; kum hnih a pumhlum hmain Mizoram Governor a ni ve leh ta a ni.