KHAWTHLIR

Thisen pe
Saitual Joint YMA chuan nimin khan Saitual khaw kum 100 tlin lawm nan Saitual Chhimveng Presbyterian Kohhran hall-ah blood donation camp an buatsaih a, Aizawl Civil Hospital tan thisen unit 148 an pe a, a petute mipa 117 leh hmeichhia 31 an ni.

Edu Expo 2015
Dr Deb Educational Society, Aizawl chuan nimin khan Vanapa Hall-ah Edu Expo 2015 an buatsaih a, Dr Ngurdingliana, MLA-in a hawng. Edu Expo-ah hian Mizoram páwna zirna in 15-te'n aiawh an rawn tír a, zirlaite hnenah scholarship nen ṭangkawpa zirna sang zawm theih dan an kawhhmuh a ni.

Ice Plant hawng
Minister Lalrinmawia Ralte chuan nimin khan Zawlnuam khuaa Rs. 17,67,000 sênga din Mini Ice Plant a hawng. Ice Plant-ah hian vúr tlang quintal 30 dahṭhat theih a ni a, vúr tlang pakhat chu kg. 15-a rit a ni. Vúr tlang pakhatin sangha kg. 15 ni hnih chhung a vawng ṭha thei a; subsidy rate-in mipuiin vûr tlang pakhat Rs. 30-in an lei thei ang.

Motor insuah thi
May 25, Thawhṭanni zan dar 10 vel khan Sikulpuikawn bulah scooty MZ-01 H-3076 leh bike MZ-01 F-7888 an insû a; scooty khalhtu Daniel Malsawmkima (23) s/o B Sanga Sailo, Republic Veng chu Aizawl Civil Hospital thlenpui a nih hnuah a thi.

Heroin man
Central YMA hnuaia SRS-te chuan Thawhṭanni zan khan Ṭhuampui, Aizawlah heroin gram 15 leh a neitu Lalnunziri (35) d/o Lalbiakkima, Falam, Myanmar nia insawi an man.

Doctor zirlai thi
MGM Medical College, Indore-a internship ti mek Vanlalsanga Zathang (27) s/o Siamkungi, Tuithiang, Aizawl chu May 22, 2015 zan dar 8 velah bike-in a chesual a, damdawi-inah enkawl zui ni mah se, a hliam tuar loin May 25 zan dar 10:45 khan a thi. A ruang hi May 28-ah an in thlenpui beisei a ni.

Power siam dawn
Power & Electricity department chuan tukin dar 10 aṭanga tlai dar 4 inkarah 33KV Lower Sub-Station, Zuangtuiah 11KV panel an siam ṭha dawn a, he Sub-Station-in a châwm Aizawl hmâr lam vengahte kawlphetha an nei lo ang. P&E chuan mipui hriatthiamna an ngen a ni.