College exam paper endik duh lo
Mizoram University hnuaia degree course examination paper endik dan tura MZU-in ruahmanna a siam chu Mizoram College Teachers Association (MCTA)-in an duh loh avangin examination paper-te endik a la ni lo.
Thu dawn danin, examination paper-te chu May 25, 2015 khan PUC-ah endik tura tih a ni a, MZU lamin examination paper chu an roll number pangngai thup loin, number dang pe (coding) loa endik turin an ti a, hei hi MCTA chuan an pawm thei lo.
MCTA hruaitute chuan, nikum examination paper pawh code pe loa endik a nih tawh thu sawiin, "A leh pekah chuan coding pe ngeia endik ni tawh se, tiin rawtna kan siam a ni," an ti a; code pe loa endik tura tih a nih leh tâk avangin, exam paper-te chu an endik duh ta lo tih Vanglaini an hrilh.
Vanglaini palai zawhna chhangin, MCTA hruaitute chuan, code pek a nih loh chuan lecturer-te'n an college zirlaite roll number an hriat theih vek thu an sawi a, "Thil tih dik tâwk lo a awm palh thei. Code pek a nih hma loh chuan examination paper hi endik kan tum lo," an ti.