I League khelhna atan a tul angin Lammual kan thuam ang - Hawla

Chief Minister Lal Thanhawla chuan, India rama football club inelna sang ber I League thleng theiturin a tul a nih phawt chuan Lammual thuam that a nih tur thu a sawi.

Sorkar thuchhuah tarlan danin nimin tlai khan Chief Minister hi a bunglow-ah All India Football Federation-a I League lam enkawltu, Indranil Das bakah MFA hruaitute leh Aizawl FC hruaitute'n an kawm a, Chief Minister chuan, "Lammual hi kan khelmual pawimawh a ni a, hetah ngei hian I League hi Mizo mipuite'n en an chak a, a tul angin kan thuam tha ang," a ti.

I League khelh theihna tur hian khelmualin tehna hrang hrang a paltlang a ngai a, Lammual endik tur hian AIFF Assistant Manager, Club Licensing & League Operations Indranil Das hian Aizawl a rawn tlawh a; Lammual a endik bakah tun hnaia I League khel tura tling thar Aizawl FC inrelbawl dan a endik bawk.

Chief Minister chuan Mizoram sorkarin infiamna tihmasawn tura theihtawp a chhuah thu hrilhin, "Kan sum neih ang angin infiamna lam tihhmasawn kan tum a, ṭhangtharte tana hmunhma ṭhate siamsak kan tum a, kan hnathawhin rah ṭha a chhuah ṭan mek hi a lawmawm hle a ni. India rama football inelna sang I League kan thleng thei tur hi a lawmawm hle a ni," a ti.

Indranil chuan Mizoram Chief Minister hnenah lawmthu hrilhin, "India ramah hetiang taka football tuipuitu Chief Minister leh sorkar hi kei chuan ka la hre ngai lo. Mizoram Football Association hruaitute inpekna leh hnathawh ropuizia kan hre tawh a, sorkar hnathawhte a taka hmu theia ka lo kal hi ka lawm hle a ni. Hei hian Aizawl FC pawh nasa takin a pui ngei ang," a ti.

AIFF official hian Lam­mual a hmuh dante hi AIFF-ah a thehlut ang a, chumi hnu chuan Lammuala I League khelh a nih leh nih loh turah thutlukna siam a ni dawn a; Lammual chu I League khelhna tura a tlin ngei a beisei thu a sawi a, Chief Minister-in thawm ṭhat ngai a awm chuan thawm ṭhat a inpeih thu a sawi chu thlamuanthlak a tih thu a sawi bawk.

MFA Honorary Secre­tary Lalnghinglova Hmar chuan I League kalphung leh inbuatsaih a ṭul dante a sawi fiah a, MFA-in Aizawl FC ṭanpui a inhuam thu a sawi bawk.

MFA president leh Health Minister Lal Than­zara bakah Aizawl FC President Robert Romawia Royte-te pawh inkawmnaah hian an tel.