CM-in Horticulture Fair 2015 a hawng

Organic farming chak zawka kalpui a ṭul: CM Horticulture department chuan nimin aṭang khan Assembly Annexe conference hall-ah Horticulture Fair 2015 an buatsaih a, chief minister Lal Thanhawla'n a hawng. CM chuan, organic farming chak zawka kalpui ṭul a tih thu a sawi.

Chief Minister chuan, buh leh thlai thianghlim thar chhuahna turin organic farming chak zawka kalpui a ṭul thu sawiin, "Páwn lama thlai thar, DDT hmanga an châwm lente kan la lut reng hi tihtawp a ṭul hle a, hemi atan hian sorkarin ruahmanna a siam mek a ni," a ti.

Ei leh barah Mizoram a intodelh lo hle tih sawiin, Lal Thanhawla chuan, "Kum khatah thla thum daih kan thar chhuak lo a, vaiho thar chhuahah kan innghat a, a chhuanawm loh hle a ni. He mi aṭanga tâl chhuah hi kan tihmâkmawh a ni," a ti a; intodelh turin taimakna, rinawmna, dikna leh tumruhna nena hna thawh a ngaih thu a sawi.

CM Lal Thanhawla chuan, Mizoram chu thlai chi tam tak ṭhat duhna, ram ṭha, sik leh sa leh ruahtui tamna a ni tih sawiin, chungte chu hman ṭangkai a ṭul thu a sawi a, "Kut hnathawktute hi sorkarin a ngai pawimawh hle a, department tin hian ngaih pawimawh hmasak berah dah ṭhin se. NLUP pawh hi kut hnathawktute tana kalpui a ni," a ti.

Chief Minister chuan, eng hnaah pawh eirûkna hri chhia lakah fihlim a ngaih thu sawiin, 'Kuttling loa thil tih leh tum hi hmasawnna dâltu lian a ni a... Kan thlen chin aṭanga hmasawn zel tur kan ni," a ti a; sorkar thuneitute chu eirûkna leh induhsak bikna awm loa rualkhai taka kut hnathawktute hmakhua dah pawimawh turin a chah.

Khualzahawm PC Lalthanliana, Horticulture minister pawhin thu sawiin, sorkarin kut hnathawktute a ngai pawimawh tih a sawi a, "Tuna sorkar hian NLUP a kalpui meknaah a tih tur a hmaih lo a, loneitute zawkin an tih tur an tih loh ṭhin avangin hlawhtlinpui lo an awm a ni. Horticulture potential area hâi chhuah kim a nih hunah link road siam vek a ni ang," a ti.

Horticulture department chuan kum 2012 aṭangin Horticulture Fair an buatsaih ṭan a, kuminah pawh hian district tin aṭangin mi 10 ṭheuh Fair-a tel tur leh thlai leh pangpar enkawl dan zir tura thlan a ni. Horticulture Fair-ah hian kum 2012-ah dawr 57 siamin, cheng nuai 17 chuang an hmu a, kum 2013-ah nuai 22.9 leh kum 2014-ah nuai 12.4 vel an hmu a ni.