MNF-in 'dahṭhat' an la sim lo hi pawi kan ti hle a ni - ZPM Ṭhalai

ZPM Ṭhalai chuan thuchhuah siamin, MNF party press release-ah, 'Mimal inhuatna avangin MLA a disqualify theih loh,' an ti chu zah theih loh thlâk an tih thu an tarlang a, "An thil sual tih hretute laka 'dahṭhat' tih thupui an la sim thei lo hi pawi kan ti hle a ni," an ti.

ZPM ṭhalaite chuan, Assembly House-ah CM Zoramthanga mualpho zual zel loh nan, a dâwt sawi dang puan chhuah leh hmain, session neih leh hma ngeiin Lalduhoma chu dahṭhat a nih thu mipuiin an hria tih an sawi a; "Mahni Mizopuite thisen kái party an nihna lan chhuahtirin, dik lo taka ram danpui kaihlekin ram tana an rawngbawlpui ngei pawh an dahṭha a ni," tiin, MNF chu an kutah thuneihna inpe chawpah an puh.

Phaizau khawtlángin lui an humhalh lai H Lalzirliana, MLA leh MNF hruaitute'n an bomb ngei tih khawtláng hruaitute'n an finfiah tih sawiin ZPM Ṭhalai chuan, "Ngáwi dawh anga insawi a, khaw êng zah hauh loa phat marna an zawng hi dâwt sawi ṭhang, an dâwt sawi thupna tura dâwt dang sawi hreh lo MNF-te tih âwm tâwkah kan ngai," an ti a; dan ngai pawimawha insawi MNF party-in dan bawhchhiaa dâwt sawitu an mite chunga action an lâk dan tur an thlir mek thu an sawi.

ZPM ṭhalaite chuan, MNF party chu dâwt sawi sim tawh turin an ngen a, "An dâwt sawi tawh ṭhinah Mizo mipui hnenah ngaihdam dil se. Phuba lâkna aiin ram leh hnam hmasawnna hnathawh hi an chaw tui ber lo ni tawh se. Indahṭhat bànsan a, hmasawnna hnathawh kawnga min el turin kan sawm a ni," an ti.