ZPM ZONU an ṭawngṭai rual

ZPM ZONU member-te chu nimin khan ZPM pisa conference hall-ah an inhmu khawm a; MLA aṭanga bàn tak Lalduhoma bakah, amah hêktu MNF MLA 12-te leh Assembly speaker Lalrinliana Sailo tan an ṭawngṭai rual.

ZPM ZONU president C Sangzuali chuan, Assembly Speaker-in ZPM Legislature Party leader Lalduhoma, MLA aṭanga a bàn chu pawi an tih thu sawiin, "Kan lainat tak zet a, hetianga dik lo taka MLA aṭanga bàn a ni hi kan dem tak zet," a ti.

C Sangzuali chuan, "Zoram mipui hian MNF party hi Pu Lalduhoma vanga vawiin nía hetiang dinhmun thleng thei leh thlamuang taka awm thei an ni tih hi kan hai lo a, anmahni pawhin an theih­nghilh bikin ka ring lo. A laka MNF thil tih duh dan hi pawi kan ti a, tun hnuah tu chungah mah thleng nawn tawh lo se, kan duh," a ti a; Lalduhoma chunga thil thleng chu Kristian state-a thleng atan zahthlak an tih thu a sawi.

ZPM ZONU thuchhuah chuan, Mizoram chhung leh páwna Lalduhoma lainata khawngaihtu zawng zawng leh atana thilpek pe a, ṭawngṭaipuitu zawng zawng chungah an lawm tak meuh thu a tarlang.