LADC-ah minister-te an campaign

Minister of state pahnih - K Lalrinliana leh Robert Romawia Royte-te chuan Lai Autonomous District Council (LADC) MDC inthlanpuia inbuatsaih nan khaw hrang hrang an fang. Minister dang Lalruatkima'n nimin khan Lawngtlaiah thuthar thehdarhtute a kâwm thung.

Minister pahnih hian November 30, Thawhṭanni khan Sangau, Pángkhua, Thaltlang, Sentetfiang khuate an tlawh a; nimin khan Cheuràl, Lungtian, Rãwlbûk, Lungpher South, Siachangkawn, Bualpui NG, Lungzarhṭum leh Tlangpui te an tlawh bawk.

K Lalrinliana leh Robert Romawia te hi MLA pathum - H Biakzaua, Lawmawma Tochhawng leh Dr K Pachhunga ten an ṭawiawm a ni.Minister of state Lalruatkima pawhin nimin khan Lawngtlaiah thuthar thehdarhtute a kâwm a; Lairam hmasawnna thlen turin MNF sorkar leh an candidate-te an ṭha tâwk tih sawiin, "Lairam hmasawnna turin theihtawp kan chhuah dawn. MNF hian hmachhawp tam tak a nei a, chumi tihlawhtling tur chuan LADC-ah MNF sorkar a din hi a ṭul hle. A kàwi a ngíla kan thurualpui theih MNF sorkar a din a ṭul tak zet," a ti a; MNF-in sorkar ngêlnghet leh mipui sorkar din an tum thu a sawi.

Lalruatkima chuan, LADC term kal mekah INC leh BJP-te chu an inthlàwp avangin inthlan turah pawh thawhho rilrua nei sain ruahman rûk an neia a lan thu a sawi a, "Party mala sorkar an inring lo sa tih an chiang a, thuthlung rûk an nei sain kan hria," a ti.