Heroin kawltute kum 10 tâng turin hrem

Kolasib Fast Track Court chuan heroin phurtu hnam dang pahnih - Assam-a Karimganj district mi ve vete chu kum 10 táng tur leh Rs 20,000 ve ve chawi turin a hrem.

Thu dawn danin, January 17, 2024 zing dar 8 vel khan Phaisen police checkpost-ah Mizoram police-te'n an lirthei (truck) TR-01 AR-1943 aṭangin heroin (no. 4) hawng 22 an man a, gram 262.48-a rit a ni. Truck-a chuang Muffazul Ahmed (29) s/o Sahab Uddin leh Rafique Uddin (23) s/o Tasarup Ali, Karimganj district-a chengte an man nghal bawk.

Muffazul Ahmed leh Rafique Uddin te hi Aizawl lam aṭanga chhuk thla niin, Bilaipur, Hailakandi pan tura kal an ni a, an lirtheiah bungraw dang an phur lo. Police duty-te'n report an dawn bawhzuiin an lo tiding a, an enfiah hnuah heroin an hmu chhuak a ni.

Thubuai hi Kolasib Fast Track Court-ah judge R Vanlalena'n a ngaihtuah a, nimin khan thutlukna siamin, hrem dan tur a puang. Muffazul Ahmed leh Rafique Uddin hi hrehawm taka kum 10 (sawm) chhung táng tur leh Rs 20,000 ve ve chawi turin Court chuan a hrem a; pawisa an chawi loh chuan thla thum dang tàn belh turin a ti bawk.