Hindi zirtirtu siam rem a ni dawn

School Education minister Dr Vanlalthlana chuan, Hindi zirtirtute siam rem a nih dawn thu a sawi a, "Hindi teacher-te sikul tina an awm dan lak khawm a ni," ti.

Vanglaini palaiin a kawmnaah Dr Vanlalthlana chuan, sorkar hnuaia lak Hindi zirtirtu, private school-a thawkte pawh an awm thu sawiin, "Private school-a thawk zawng zawng hi pawh kir vek a ni dawn a, sorkar sikulah dah an ni ang," a ti a, ruahmanna an siam mek thu a sawi.

Education Minister chuan, sorkar sikulah Hindi zirtirtu awm zat an khairual lo hle tih a sawi a, "Sikul ṭhenkhatah chuan pathum/palite an awm a, chutih laiin, sikul eng emaw zat chuan Hindi teacher an nei lo," a ti.

Sikul tina awm daih Hindi teacher an awm tih sawiin Dr Vanlalthlana chuan, "An awm tamna sikul aṭangin kan la chhuak ang a, a nei lo sikulah kan dah dawn," a ti a; sikul tinin Hindi teacher an neih theih nan chak taka hma an lak mek thu a sawi a ni.