Bangladesh aṭanga rawn raltlante khaw pali-ah dah khawm tum a ni

Adviser to CM (Political) Lalmuanpuia Punte, MLA chuan, Bangladesh aṭanga sahimna zawnga Mizorama rawn lutte chu Parva, Damdep-II, Cherluitlang leh Saizawh West khuaah awm khawmtir tura ruahman a nih thu a sawi.

Lalmuanpuia Punte hian nimin khan Lawngtlai DC conference hall-ah Bangladesh aṭanga raltlante chungchang Lawngtlai bawrhsap Cheemala Siva Gopal Reddy leh Lawngtlai district-a sorkar hotute leh pawl hruaitute a sawipui a; Bangladesh aṭanga raltlante dinhmun enfiah bakah, rawn lut leh tur an awm pawha mumal zawka dawnsawn dan tur zir chiang tura kal a nih thu a sawi a ni.

Raltlante tan inkaih-hruaina mumal zawk siam a ṭul thu sawiin Lalmuanpuia Punte chuan, "Raltlante hmun khata an awm khawm chuan enkawl danah sorkar tan hmalak a awlsam dawn a, hmun khata awm khawm turin hmalak mek a ni. Bang­ladesh aṭanga raltlante chu hmun pali - Parva, Damdep-II, Cherluitlang leh Saizawh West-ah sawn khawm tura ruahmanna siam mek a ni," a ti.

Parva, Damdep-II, Cherluitlang leh Saizawh West-hi chu Study Team-in November 20, 2024 khan an tlawh thu sawiin Lalmuanpuia chuan, "Khawtlang hruaitute pawh sawipui tawh an ni," a ti a; Study Team-te chuan an thil zir chian leh enfiahte chu High Level Committee on Bangladesh Refugees-ah an thlen leh dawn thu a sawi.

Lawngtlai DC Chee­mala Siva Gopal Reddy tarlan danin, Lawngtlai district-ah hian ráltlân - Myanmar aṭangin mi 6,030, Bangladesh aṭangin mi 2,014 leh Manipur aṭangin mi 84 an awm mek a ni.

Cheemala Siva Gopal Reddy chuan, raltlante enkawl danah theihtawp chhuah a nih thu sawiin, "Myanmar, Bangladesh leh Manipur aṭanga him­na zawnga rawn lutte chhawm­dawl kawngah sorkar laipui leh Mizoram sorkar duh dan leh thupek angin hmalak zel a ni," a ti a; raltlante tan buhfai sem mek a nih thu a sawi.