Central service-ah Mizo kan tlin theih nan ṭan lak a ṭul - Sapdanga

Minister K Sapdanga chuan, Mizorama sikulte'n central service officer an hring chhuak ta lo hle tih sawiin, central service-ah Mizote an tlin tam leh theih nan zirlaite'n ṭan an lak a ṭul thu leh zirtirtute pawhin zirlaite an fuih phûr a ṭul thu a sawi.

K Sapdanga hian nimin khan Gandhi Memorial High School, Champhai, kum 75-na, platinum jubilee a hmanpuinaah thu sawiin, Mizo zingah central service leh all India service-ah tling an awm tawh mang loh avangin, Mizo tam zawk an tlin leh theih nan ṭan la lehzual turin zirlaite leh zirtirtute a fuih a ni.

GM H/S aṭang pawhin central service-a inziak tlingte an lo chher chhuah tawh ṭhin thu sawiin Sapdanga chuan, "Tunah erawh he sikul chauh ni lo, Mizorama sikul hrang hrangte'n central service kan hring chhuak tam ta lo hle a, zirlaite'n ṭan kan lak a ṭul a, zirtirtute pawhin zirlaite kan fuih phûr a ṭul," a ti.

K Sapdanga chuan, "Mizo fa, direct IAS leh IPS kan awm ta mang lo hi ram rawngbawlna han chelh chuan a hrehawm ta lek lek mai. Tuna zirlai la ni mekte lo hi chu hmachhuan tur kan nei chuang lo a, Mizoram hma hun hi in kutah thui tak a innghat a ni," a ti a; sorkar pawhin ṭan a lak zel dawn thu a sawi.

Minister Sapdanga chuan, Mizoramin all India leh central service regular/direct recruit a nei tlem tawh bakah, a awm chhunte pawh Mizoramin a chang vek thei lo tih a sawi a, "District hrang hrangah Mizo ngei DC leh SP dah duh ṭhin mah ila, kan indaih miau loh avangin hnam dang dah a ṭul a ni," a ti.

Home Minister chuan, Champhai Zote aṭangin GM H/S-ah kum 1971 aṭangin a luh ve tawh thu sawiin, "Kum 1974-ah pawl 10 kan zir chhuak a, kan headmaster chu Pu Thanseia a ni," a ti a; GM H/S chu a nun kawng sialtu pawimawh a nih thu a sawi.

K Sapdanga chuan, Chief Minister nen an inbiaknaah GM H/S building chu thawm ṭhat ni se an tih thu leh a kum 75-na pualin thawm ṭhat a nih tur thu a sawi bawk.

GM H/S hi kum 1949-ah din a ni a; zirlai 232, zirtirtu 14 leh IV grade pakhat an awm mek a; Minister-in GM H/S headmaster pension tawh R Khawbula leh Rohmingthanga te hriatrengna chawlhbûk a hawng a ni.