Sorkarin Selinga in a ṭhiah neitu hnenah zangnadawmna pe turin thuneitute phût

Centre for Environment & Social Justice (CESJ) chuan, khawl hmanga mi in ṭhiahsak chu Supreme Court thupek bawh­chhiatna a nih thu an tarlang a, Seling khuaa Lalhmangaihi in sorkarin khawl hmanga a ṭhiah avangin a phû tâwk zangna­dawmna pe turin an phût.

CESJ chuan thuchhuah siamin, November 19, 2024-a sorkarin Lalhmangaihi in ṭhiahsak a nih chungchanga Aizawl DC Office-a Land and Building Branch-in sawifiahna a tihchhuah chu an chháng a, "An rawn insawifiahna hian assessment thar NHIDCL-in a hnâwl vek tih an tarlang hi compensation an la pe lo tih tifiahtu a ni," an ti a; compensation chinfel hmaa eviction order chhuah chu ‘Natural Justice’ kalh a ni tih hre turin thuneitute an ngen.

Khawl (excavator) hmanga mi in ṭhiah chungchangah November 13, 2024 khan Supreme Court-in thutlukna a siam a, ‘Bulldozer Justice’ tih a nih thu tarlangin CESJ chuan, "Executive hian mi in leh lo leh bungruate a neitu misuala puh a ni emaw, thiam loh a chang emaw a nih vang ngawtin bulldozer-a nawr chhe tura thupek siam turin thuneihna a nei lo," an ti a; Rule of Law leh Separation of Power kalh a nih thu an sawi.

CESJ chuan, Supreme Court order angin, executive (sorkar hnathawk)-in mi in ṭhiahna thupek a chhuah a nih chuan a thuneihna piah lam a nih thu an tarlang a, "He (Selinga) thil thleng hi kan ngaizam dawn lo a, hmasawnna hna avanga hmeithai in ṭhiahsak hi a rang thei ang bera a in leh lo phu tâwk zangnadawmna pe thuai turin thuneitute kan phût a ni," an ti.

In ṭhiahna order kengkawhtu Executive Magistrate-in khawtlang hruaitute a thamlo hle nia sawiin CESJ chuan, "Mizo khawtlang nuna hmeithai, chhumchhia leh chak lo leh áwm ném zawk, khawtlang mipuiin dimdawi taka an tuamhlâwma an dâwm kân ṭhin a tih dan hi pawmzam a har hle," an ti a; tun hnuah thleng tawh lo se an duh thu an sawi.

CESJ chuan, Mizoram sorkar kal tawhte chu vai construction company, a bikin NHIDCL thu thuin an thên vel mai mai nia a lan thu sawiin, "Development hming chawia dan loa hna an thawh a, kan thing leh mau, a hmuna cheng nungcha chhiar sen loh an tihchimih a, dan loa an leivung paihin kan lui zawng zawng an tihchhiat kawngah ti tawh lo tura thupek chhuah ngam si lo a, hmeithai pakhat in ṭhiat tura thupek an chhuah ngam si hi mahni ram leh hnam phatsanna tlingah kan ngai," an ti.

Supreme Court thuchhuakte an hriatthiam hnua sorkarin Selinga in an ṭhiahsakte an lo bia chu lawmawm an tih thu leh, an inbiaknaah a tuartute lungdamna thlapin inremna siam ngei se an duh thu an tarlang bawk.