Lunglei bypass road ruahmanna sawiho

Lunglei bawrhsap R Lalṭhazuala hoin nimin khan Lunglei DC conference hall-ah Lunglei khawpui hêlna kawng (bypass road) sial dan tura ruahmanna sawiho a ni. Kawng ṭha leh tlo a awm theih nan leivûng paihna tur leh leilung tana him tur ngaihtuah lâwka ruahmanna siam ni se, an ti.

Ruahman dan chuan, Lunglei bypass road hi Tlawng lei chhaka Saza Bangla chhak deuhah Aizawl-Lunglei kawng pangngai aṭangin a peng ang a, tlâk lamah hniam deuh hlekin Lunglei khawpui hêlin, Sazaikawn pengṭhuamah a chhuak dawn a ni. A pèn ṭanna aṭanga a tawpna thlengin km. 21.55-a thui ni tura ngaih a ni.

Lunglei DC chuan, Lunglei khawpui hêlna tur kawngpui ṭha neih chu khawtlangin an nghahhlelh thu a sawi a, "NHIDCL leh PWD aṭangin a kal khàn ṭha nia ngaihte pawh riruat tawh a ni nâin, kawng kalna tur thlan hnuah detailed project report (DPR) siam a, Ministry of Road Transport & Highways-ah pawmpui tura thehluh chauh tur a la ni," a ti a; Lunglei khawpui tana ṭha ber tur ngaihtuah a ṭul thu a sawi.

Ṭhutkhawmah hian Lunglei bypass road atana NHIDCL-in kawng kalna tur (alignment) an ruahman chhin pali leh PWD ruahman chhin pahnih thlirho a ni. Lunglei khawpuia lirthei tlân tihzângkhai dan tur te, mipui tana awlsam, zângkhai leh mipuiin an chhawr theih dan tur te, ei leh bara hmasawnpui theih tur te, leilung leh chhehvel tana him tur te, ram lâk leh kawng siamna senso tur leh nghawng a neih tur hrang hrangte sawiho a ni bawk.

Lunglei mipui tana ṭha, awlsam leh ṭangkai ber tura ngaih NHIDCL ruahmanna pali zinga pakhat milin, PWD leh kal khawmte'n rawtna an neihte rin lut tel chungin DPR ruahman ni se, kawng ṭha leh tlo a awm theih nan leivûng paihna tur leh leilung tana him tur ngaihtuah lawka ruahmanna siam tum ni se, an ti.

Ṭhutkhawmah hian Lunglei North bialtu MLA aiawh te, Lunglei Municipal Council Ward-I councillor Lalhruaitluangi Sailo, sorkar department hrang hrang leh NHIDCL hotu te, pawl hrang hrang aiawhte leh Pûkpui, Zotlang, Rahsi Veng leh Sazaikawn local council hotute an tel a ni.