Jail tángte tan house wiring training

District Jail, Lungleia táng mekte tana house wiring training buatsaih tur chu nimin khan Lunglei additional DC Rochuangkimi Khenglawt-in a hawng a; District Jail-a awmte'n Krismas leh kumthar an hmanna atan Rs 20,000 a hlan nghal.

Lunglei DC hmalaknaa HDFC-RSETI hnuaia house wiring training buatsaih turah hian a bul ṭan nan training tur mi 34 thlan a ni a, ni 30 chhung zirtir an ni dawn. An zir zawhah Ministry of Rural Development aṭangin NSQF qualified certificate hlan an nih dawn a, HDFC aṭangin an bul ṭanna tur remchang ruahman a ni bawk ang.

Rochuangkimi Khenglawt chuan, Lunglei DC hmalaknaa HDFC Bank aṭanga RSETI hnuaia thiamthil inzirtirna hun buatsaih a ni chu a ṭangkai tur thu a sawi a, "Rilru leh tih tak zetin zir u la, eizawnna ngêlnghet atan hmang thei turin chhawr tlak thiamna puak chhuah tum ngei ang che u," a ti.

Training hawnna inkhawm hi soft skill trainer F Lalruatfeli'n a kaihruai a; District Jail superintendent Lalrampari (SDC) chuan, puanṭhui, computer hardware & software leh thiamthil dang zirnate pawh buatsaih zel tum a nih thu a sawi.