Mipui tana hmuh theihna hun hawng

Minister of state Prof. Lalnilawma chuan November 20 leh nimin khan a bial, Ṭawi huam chhunga khaw ṭhenkhat a tlawh. Nilaini khan Saitual Tourist Lodge-ah mipui tan mamawh thlenna hun a hawng a, nimin khan Mualpheng, Ruallung, Rulchawm, Ṭawizo leh Maite-ahte public interview hun a buatsaih bawk.

Prof. Lalnilawma chuan, kalphung thar mipui sorkarah hmasawnna hnathawhte mipuiin ṭha bik tur leh ro tling tak ni turin an beisei tih sawin, "Beiseina sang tak nena min thlir rengtu mipui kan tibeidawng thiang lo. Development work hi sorkar hmel lanna pawimawh a nih avangin hna thawktute pawhin ram hmangaihna thinlung pu chunga hna an thawh ka phût a ni," a ti.

Ṭawi bialtu MLA hian a biala health & wellness centre leh sikul ṭhenkhatah MLA fund hmanga a lei computer, oxygen concentrator leh solar lamp-te a pe a ni.

Prof. Lalnilawma hian November 20 khan a bial chhung Selinga NH-06 kawngpui kama sorkarin khawl hmanga in a ṭhiahsak neitute a tlawh bawk a; thil thleng chu pawi a tih thu sawiin, Competent Authority for Land Aquisition (CALA) leh ram neitute thu leh hla a hun taka inhmuh tawnsak loh vanga thleng nia a hriat thu a sawi. Ram/in neitute harsatna chu a rang lama chinfel dan ngaihtuahpui a tum thu leh sorkar hotu dangte sawipui a tum thu a sawi bawk.