MSPMC-in sangha dahna an endik

Mizoram State Project Monitoring Committee (MSPMC) chuan nimin khan Thenzawla sangha pui dah khawmna leh sangha no keutirna tur brood banks siam hna thawhte an endik a; thawktute nen inkâwmin, hnathawh ṭha tâwk lo lai an hmuhte an hrilh.

MSPMC vice chairman R Lal Rinawma chuan, sanghaa intodelh turin hmachhawp lian tak an nei tih Fisheries department hotute a hrilh a; ṭhahnemngai tak leh tih tak zeta thawk tur leh, a hlawhtlin ngei theihna tura ṭan la turin a chah. Brood banks a hlawhtlin a, a kal leh zelna tur atan hmathlir ṭha neih a pawimawh thu a sawi.

Fisheries joint director Zonun-tluangi chuan, MSPMC-in brood bank tlawh a, an hmalak zelna tur atana thuràwn ṭha tak tak an pe chu lawmawm a tih thu sawiin, an thuràwn pekte chu theihtawpa an bawhzui tur thu a sawi a ni.

Endiknaah hian MSPMC Vice Chairman bakah, secretary Lalthanzuala Ralte, member Prof. Chawngsailova leh Vanlalhruaia leh, MSPMC Task Force member Vanchhungi an tel a; Fisheries department aṭangin Joint Director leh thawktu dangte bakah, Thenzawl East VC aiawhte leh chanchinbu mite an tel a ni.