KHAWTHLIR

ṬKP-in thisen pe

ṬKP, Bawngkawn Unit chuan nimin khan Synod Hospital tan thisen unit 27 an pe a, petute mipa 24 leh hmeichhia pathum an ni.

Mei zu mi 8 man

Aizawl District Anti Tobacco Squad chuan nimin khan Laipuitlang leh Bawngkawn inkara sorkar pisaahte dan kalha mei zu an awm leh awm loh an endik a, phal lohna hmuna mei zu mi pariat manin, pawisa an chawitir.

Ran enkawlna tlawh

Animal Welfare Board of India aiawh Dr RB Chaudhary chuan November 17-20, 2024 chhung khan Mizoram a rawn tlawh. RB Chaudhary hian AH&Vety department leh Aizawl Municipal Corporation hotute a kawm bakah, JB Foundation din Animal Rescue Centre, Bung Bangla leh Ṭhuampuia JB Paws Hospital a tlawh a ni.

Kawng khâr dawn

Aizawl SP Rex Zarzoliana chuan thupek chhuahin, Chhangurkawn leh Luangmual Presbyterian biak-in inkar kawng siam chu chak zawka siam a nih theih nan November 25-30, 2024 chhungin khâr a nih dawn thu a puang. Sakawrtuichhun aṭanga NH-54 kawng (via Lungverh) pawh siam a nih avangin vawiin aṭangin kawng siam chhung zawng khar a ni dawn tih a puang bawk.

Kawlphetha awm dawn lo

Power & Electricity department chuan naktuk Inrinni hian zing dar 9 aṭanga tlai dar 3 thleng Zuangtuia 132KV sub-station ah hna an thawh dawn avangin Aizawl hmun ṭhenkhatah kawlphetha pek chhuah a ni dawn lo tih an tarlang. Kawlphetha hmu lo turte chu Treasury/Venghlui/Tuikual South aṭanga hmar lam leh chhuah lam veng zawng zawng, Sihphir thlengin a ni a, Trinity Hospital a tel bawk.

Roll ennawn sawiho

Aizawl district electoral roll observer Dr Lalrozama hoin nimin khan Aizawl DC conference hall-ah Aizawl district ERO/AERO te, political party, CYMA, MHIP leh MUP aiawhte'n electoral roll ennawn mek chungchang an sawiho. Aizawl district-ah ERO leh AERO 12 ve ve leh BLO 324 an awm a; draft electoral roll-ah voter 2 88,962 awmin, mipa 1,35,159 leh hmeichhia 1,53,803 an ni.