India leh Bangladesh insumdawn tawnna tur Tihkhawtlai a rem tawh lo - Kiren Rijiju
Union minister of state for Home Affairs Kiren Rijiju chuan, nimin khan Tlabung bula ramri hung tawhte leh India leh Bangladesh insumdawn tawnna tur Kawr-puichhuah a tlawh a; India leh Bangladesh insumdâwn tawnna tura hmalâkna chu tihkhawtlài a rem tawh lo tih a sawi.
MoS for Home Kiren Rijiju chuan, ram pahnihte insumdàwn tawnna turah hun rei tak chhung hmalâkna a awm mumal lo tih sawiin, pawi a tih thu a sawi a, “Chhan eng vang mahin ram pahnihte insumdàwn tawnna tura hmalâkna hi tihkhawtlài a rem tawh lo a, rei lo te chhungin thil ṭul leh bawhzui ngaite chu Mizoram sorkar hriattir a ni ang a, sorkar laipuiin theihtawp a chhuah dawn a ni,” a ti.
Indo-Bangla Border Trade atana hmalakna chak zawka bawhzui turin a viltu tur nodal officer ruat a nih tur thu sawiin, Kiren Rijiju chuan, integrated check post-in thil tam tak a ken tel avangin a dahna tur ram chu tuna ruahmansa aia zau zawk buatsaih a ṭul tur thu a sawi a, “Indo-Bangla Border Trade hlawhtling taka kalpui turin kawng zau tak a inhawng a ni,” a ti.
Zawhna chhangin Kiren Rijiju chuan, hun rei tak chhung hmarchhak state ngaih pawimawh a ni ngai lo a, hmasawnna thlen thei tura buatsaih a ni ngai lo tih a sawi a; Asia chhimchhak ram hrang hrangte tan hmarchhak state tlawhpawh a remchang tih sawiin, “Insumdàwn tawnna a hlawhtlin chuan hei hian ram pum hmasawnna ropui tak a thlen thei a ni,” a ti.
Bangladesh aṭanga dân loa Mizorama Chakma pêm lut chungchangah, Rijiju chuan, state sorkar nen ṭangkawpin fimkhur taka hmalâk zel a nih tur thu a sawi a; chhan hrang hrang vangin Bangladesh-a Chakma-te hmarchhak state hrang hrangah an pém lût ṭhin tih sawiin, a chinfel hna chu sorkar mawhphurhna a nih thu a sawi bawk.
Kiren Rijiju hian ramri ven hna thawktu BSF hotute a kâwm a, ramri hung hna thawh tawhte a enfiah bawk.
MoS for Home hi parliamentary secretary (Trade & Commerce) Joseph Lalhimpuia’n a ṭawiawm a; Land Port Authority of India chairman YS Sharawat leh additional private secretary Sonam Gechen Agola ten an zui bawk. Nimin vek khan Mizoram a chhuahsan a ni.